Адамзат тарихында рухани құндылықтар қоғамның тұрақтылығы мен бірлігінің негізгі тіректерінің бірі болып келеді. Соның ішінде дін – адамның ішкі дүниесін байытып, адамгершілік қасиеттерін қалыптастыратын маңызды күш. «Діні беріктің діңгегі бұзылмас» деген нақыл сөз адамның рухани сенімі берік болса, оның өмірлік ұстанымы да мықты болатынын аңғартады. Бұл сөз тек жеке тұлғаға ғана емес, тұтас қоғамға қатысты терең мағынаға ие.
Дін – адам баласын ізгілікке, сабырлылыққа, адалдыққа және мейірімділікке тәрбиелейтін рухани мектеп. Сенімі нық адам қандай қиындық кездессе де, сабыр сақтап, дұрыс шешім қабылдауға ұмтылады. Өйткені, дін адамға тек ғибадат жасауды ғана емес, адамгершілік қағидаларын ұстануды үйретеді. Қоғамдағы тәртіп пен татулықтың сақталуына да діннің ықпалы зор.
Қазіргі таңда жаһандану үдерісі күшейіп, түрлі ақпарат көздері көбейген заманда жастардың рухани тәрбиесіне ерекше көңіл бөлу қажет. Кейбір теріс ағымдардың жетегінде кетпеу үшін адам діни сауатты болып, дәстүрлі құндылықтарды құрметтеуі тиіс. Қазақстанда түрлі ұлт пен дін өкілдері бейбіт өмір сүріп келеді. Бұл – елдегі татулық пен өзара сыйластықтың жарқын көрінісі. Сондықтан діни төзімділік пен өзара түсіністік қоғам тұрақтылығының кепілі болып саналады.
Сонымен қатар, дінді дұрыс түсіну – заман талабы. Шынайы дін ешқашан алауыздық пен өшпенділікке шақырмайды. Керісінше, ол бейбітшілікке, ізгілікке және бірлікке үндейді. Әсіресе, жас ұрпақтың бойына ұлттық және рухани құндылықтарды сіңіру – отбасы мен білім беру ұйымдарының маңызды міндеті.
Қорыта айтқанда, «Діні беріктің діңгегі бұзылмас» деген сөздің мәні терең. Сенімі мықты, рухани дүниесі бай адам өмірдің түрлі сынағына төтеп бере алады. Сондықтан әрбір азамат өзінің рухани тәрбиесіне мән беріп, адамгершілік пен ізгілік жолын ұстануы қажет. Рухани негізі берік қоғамның болашағы да баянды болмақ.
Нұрсұлтан РАҚЫМБЕК,
Нұрлыкент ауылдық
округінің әкімі
