«Жастар ресурстық орталығы» мекемесінің ұйымдастыруымен «Әулиеата жастары» өңірлік бағдарламасын жүзеге асыру аясында Жуалы ауданының құрылғанына 95 жыл толуына орай және аудан әкімінің кубогі үшін мектеп қабырғасындағы жас жайдарманшылар арасында «Әдемі маусым» атты финалдық жайдарман сайысы өтті.
Шараның мақсаты – оқушыларды білімді, білікті, тапқыр, ұшқыр ойлы болуға, өз ойын еркін жеткізе білетін азаматтарды отансүйгіштікке, ұлт жандылыққа тәрбиелеуге ықпал ету, оқушыларды адамгершілік, рухани және мәдени құндылықтары мен қажеттіліктерін дамыту, бос уақыттарын тиімді ұйымдастыруға және жас дарындыларды анықтауға және оларды қолдауға, жайдарманшылардың өзара тәжірбие алмасуына, оларды жаңа ұсыныстар мен идеялар қалыптастыруға баулу. Екі кезеңнен тұратын ойынға ауданнан алты команда қатысты.
Жастардың ұтымды әзілі мен сахналық шеберлігін сынға алып, лайықты бағасын берген қазылар алқасының құрамында «Жастар ресурстық орталығы» мекемесінің директоры Мейіржан Телеушов, Нұрлыкент ауылдық округі мәдениет үйінің маманы, асаба Ақжол Әліпбай, облыстық жастар саясаты басқармасының жастар бастамаларын қолдау бөлімінің аға инспекторы Руслан Данияр, аудандық жастар рухының хатшысы Бақытжан Бекболат, «Әдеби жігіттер» құрамасының ойыншысы Аслан Мұзафарұлы сайыста жастардың ұтқыр әзілдеріне, дайындықтарына мақтауларын да тиісті сыни-пікірлерін де білдіріп өтті.
Жайдарман сайысының қорытындысы бойынша І орынды – Б.Момышұлы ауылынан құралған «Империя қыздары» құрамасы иеленсе, ІІ орынды – Ақсай ауылдық округінің жастарынан құралған «Дихан city» құрамасы иеленді, ІІІ орынды – Қошқарата ауылдық округі жастарынан құралған «Қошқарата жастары» құрамасы иеленді. «Үздік ойыншы» номинациясымен «Серпін» құрамасының ойыншысы Мадияр Бегім, ал «Үздік жетекші» номинациясымен «Қошқарата жастары» құрамасының жетекшісі Гүлжайна Донаева марапатталды. Жайдарман сайысына қатысып өз өнерлерін танытқан жүлделі орын иегерлеріне ұйымдастырушылардың атынан Алғысхаттар, дипломдар мен ынталандыру сыйлықтары табысталды.
Жастар ресурстық орталығы
