Республика күні қарсаңында Президент Жарлығымен бір топ азаматтар мемлекеттік наградамен марапатталды.
Олардың қатарында жерлесіміз, Денсаулық сақтау ісінің үздігі, «Алтын дәрігер» медалінің иегері, ауданның Құрметті азаматы, аудандық ардагерлер кеңесінің төрағасы Жұмашев Сейітхан Шерелханұлы «Құрмет» орденімен марапатталды.
Сейітхан Жұмашев 1952 жылдың қыркүйек айында қасиетті Жуалы ауданына қарасты бұрынғы Таңшығыс ауылында туған. Денсаулық сақтау ісінің үздігі, «Алтын дәрігер» медалінің иегері, ауданның Құрметті азаматы Сейітхан Жұмашевтың денсаулық сақтау ісінің дамуына, сонымен қатар, Жуалы өңірінің әлеуметтік-экономикалық тұрғыдан дамуына қосып келе жатқан еңбегі орасан.
Әрбір адамның өзіне тән ғұмыр жолы, тіршілік баяны бар. Бірақ еткен еңбек, көрген бейнет, татқан зейнет, алған асу, жеткен биік әркімнің өмірінде әрқилы. Оны сырт көз өздерінше бағалап та жатады. Сондағы жалпының іздейтіні біреу: ол – кісілік келбет, азаматтық тұлға. Дәл осындай адами асқақ қасиетке, қанша ғұмыр кешкенімен, жеткен де бар, жетпеген де бар.
Өзінің өнегелі өмір соқпағында үлкен жауапкершілікпен, кәсіби шеберлігімен, іскерлік қасиетімен көп іс тындырған ел ағасы ретінде де Сейітхан Шерелханұлының азаматтық келбеті ерекше.
Құрметті, Сейітхан Шерелханұлы! Сізді мемлекеттік наградаңызбен барша жуалылықтардың атынан құттықтаймыз! Деніңізге саулық, ұзақ ғұмыр, әулетіңізге баянды бақыт тілейміз!
«Жаңа өмір»-ақпарат
