Бұл шара қазақ халқының рухани байлығын, ұлттық салт-дәстүрлері мен мәдени мұрасын насихаттауға бағытталған маңызды қадам болды.
Көрмеге облыстық «Әулие-Ата» қазақ мәдени орталығы» қоғамдық бірлестігінің төраға орынбасары Айгүл Кабиева, өңірлік этномәдени бірлестік өкілдері, М.Х.Дулати атындағы Тараз университетінің «Мәдениет және өнер» факультеті студенттері, «Асыл аналар» ансамблі, Жамбыл облыстық тарихи өлкетану мұражайының ұжымы және облыстық БАҚ өкілдері қатысты. Шараның негізгі мақсаты – қазақ халқының ұлттық құндылықтарын дәріптеу, өскелең ұрпақтың санасына ата-бабадан қалған асыл мұраны сақтау қажеттілігін сіңіру және қоғамдық келісім мен ұлттық бірлікті нығайту.
Көрме Қазақстан Республикасы Президентінің 2025 жылғы 24 сәуірдегі Қазақстан халқы Ассамблеясының XXXIV сессиясында берген тапсырмаларына сәйкес модельдік жол картасы аясында ұйымдастырылды. «Әулие-Ата» қазақ мәдени орталығы» осы бастаманың алғашқы қадамын жасап, қазақ мәдениетінің бірегей мұраларын көпшілікке паш етті. Ашылу салтанатында «Қоғамдық келісім» КММ басшысы Мубарак Жинақбаева, Айгүл Кабиева және Ақсақалдар кеңесінің төрағасы Асқарбек Сейлхан сөз сөйлеп, ұлттық құндылықтарды сақтаудың маңыздылығы туралы ойларымен бөлісті.
Шараның мәдени бөлімі ерекше әсер қалдырды. «Асыл аналар» ансамблі мен «Қоғамдық келісім» КММ қызметкері Қалижан Саркеевтің орындауындағы әндер көрермендердің жүрегіне жол тапса, М.Х.Дулати атындағы Тараз университетінің студенттері қазақи нақышта тігілген киім үлгілерінен сән көрсетілімін ұсынды. Бұл қойылым ұлттық киімнің сұлулығы мен шеберлігін паш етіп, мәдени мұраның заманауи интерпретациясын көрсетті.
Көрме соңында шараға белсенді қатысқан жандар марапатталып, естелік суретке түсті. Бұл шара Жамбыл облысында қазақ мәдениетінің асыл мұрасын сақтау және насихаттау жолындағы маңызды қадам болды. Көрме ұлттық бірлік пен этносаралық татулықты нығайтуға ықпал етіп, өскелең ұрпақты рухани байлықты қадірлеуге шақырды.
