1 маусым – Балаларды қорғау күніне орай, орталық алаңда «Біз – бақытты баламыз!» атты асфальт бетіне сурет салу байқауы өтті. Байқаудың өтуіне аудандық «Жастар ресурстық орталығы» және «Мехрибан-Шаңырақ» қоғамдық қорының президенті, аудандық мәслихаттың депутаты Эсмира Мамедова мұрындық болды. Жарысқа 10 мектептің оқушылары қатысты. Олар асфальт бетіне отбасына, елімізге, астанамыз Нұр-Сұлтан қаласына қатысты суреттер салды.
Шараның мақсаты – жастардың қоғамдық белсенділігін және шығармашылығын дамытып, әрбір баланың бойында елжандылық, отансүйгіштік, патриоттық сезімдерін оята отырып, бәсекеге қабілеттілігін арттыру.
Іс-шараға «Мехрибан-Шаңырақ» қоғамдық қорының президенті Эсмира Мамедова, «Жастар ресурстық орталығының» этномәдени бірлестіктерінің жұмысын үйлестірушісі Судаба Металимова, №1 Балалар өнер мектебінің мұғалімі, суретші Нұржан Өміртай қазылық жасады. Оқушылар салған суреттерімен таныстырып, жұмыстарын қорғап шықты.
Байқаудың қорытындысымен, I орын №1 мектеп-гимназияның оқушысы Зиода Евлоеваға және №5 М.Ломоносов атындағы орта мектептен келген Диана Тағайға берілсе, II орынды №1 мектеп-гимназия мен №6 А.Пушкин атындағы ОМ оқушылары Сафира Мамедова және Аяжан Сатыбалды өзара бөлісті. Сонымен қатар, III орынға №13 А.Байтұрсынов атындағы ОМ оқушысы Рабия Мамедова, №18 М.Ғабдуллин атындағы орта мектептен Балжан Ізетбекті және №15 мектеп-лицейдің оқушысы Мехрибан Аманжолды лайық деп тапты.
«Ең жас суретші» номинациясы бойынша №19 Д.Қонаев атындағы мектеп-гимназия және №13 А.Байтұрсынов атындағы орта мектептің оқушылары Нұрдәулет Жұмабай мен Ясмина Исмайлова алды. Ал, №1 МГ, №19 Д.Қонаев атындағы МГ оқушылары Юлия Некрасова мен Жансұлу Қаржаубаева «Ең үздік қылқалам шебері» болып белгіленді. Сондай-ақ, «Ең үздік сурет» номинациясы №19 Д.Қонаев атындағы МГ-ның оқушысы Зарина Кенжеқараға, №1 мектеп-гимназияның оқушысы София Головченкоға және Нұртас Мырзахметке берілсе, «Үздік бояу» номинациясы №15 мектеп-лицейдің оқушысы Қуандық Нұрмамбетке тапсырылды.
Жеңімпаздарды «Жастар ресурстық орталығы» директорының орынбасары Мейіржан Телеушов Алғыс хаттармен және бағалы сыйлықтармен марапаттады. Байқау соңында оқушыларға тәтті балмұздақтар таратылды.
Мақпал САМАТҚЫЗЫ,
«Жаңа өмір»
