Талас ауданы әкімдігінің мәдениет және тілдерді дамыту бөлімінің Ұлбике ақын атындағы мәдениет орталығының ұйымдастыруымен Жуалы, Жамбыл, Сарысу, Талас аудандарындағы көркем өнерпаздарының қатысуымен аймақтық «Үкілі домбыра» фестивалі өтті.
Байқаудың мақсаты – қазақ тарихының өнер әлемінде тылсымнан тербеп күй төккен Құрманғазы, Дәулеткерей, Тәттімбет, Дина, Сүгір сынды күй қырандарының және Ақан Сері, Біржан сал, Сегіз сері сияқты дәстүрлі өнер жолын ұстанған жыршы-термеші, домбырашыларымыздың өнерін халыққа таныту. Сонымен бірге, киелі домбыра өнерін ұрпақтан-ұрпақа насихаттау.
Күйшілер, жыршы-термешілер және дәстүрлі әншілер қатысқан байқауда, қатысушылардың белсенділігі, өнері мен сахна мәдениеті бағаланды.
«Күй өнері», «Жыр – терме өнері» және «Дәстүрлі ән өнері» аталатын кезеңдерден тұратын фесивальге Жуалы аудандық халық шығармашылығы және мәдени демалыс орталығының «Қызғалдақ» ән-би ансамблінің жетекшісі Мәлік Мықтыбеков «Жыр – терме өнері» аталатын кезеңінде үздік өнер көрсетіп, бас жүлдені қанжығалады.
Ендеше, жерлесімізді жеңісімен біз де құттықтаймыз!
