Жақында елордада Қазақстан мұсылмандары діни басқармасының төрағасы Наурызбай қажы Тағанұлы және Мысыр Араб Республикасының Қазақстандағы Төтенше және Өкілетті Елшісі Манал әл-Сайед Яхья әл-Шиннауи ханым имамдарға сертификат табыстады.
Салтанатты іс-шарада Бас мүфти Наурызбай қажы Тағанұлы: «Қазақстан және Мысыр Араб Республикасы арасында бағзы заманнан қалыптасқан тарихи байланыс бар. Аллаға шүкір, ғасырлар бойы қалыптасқан тарихи байланысымыз тәуелсіздік алған жылдардан бастап қайта жаңғырды. Бүгінде Мысырдың Уақып министрлігімен, әл-Азһар университетімен, Пәтуа беру орталығымен әріптестік байланысымыз нығайып келеді. Қазақстанға бөлінетін білім грантын екі есеге ұлғайту туралы ұсынысымызды Әл-Азһар университеті қабыл алып, қолдау білдірген болатын» деп атап өтті.
Сондай-ақ, Бас мүфти онлайн курс өткізген Әл-Азһар ұстаздарына және дәрістерді өткізуге ұйытқы болған Мысыр Араб Республикасының Уақып министрлігіне және Қазақстандағы Елшілігіне алғысын білдірді. Өз кезегінде Манал әл-Шиннауи ханым имамдардың білімін жетілдіру мақсатында осындай игі іс-шараларға қолдау білдіруге әрқашан дайын екенін айтып, біліктілікті арттыру курстары алдағы уақытта да жалғасатынын жеткізді.
Айта кетейік, Қазақстан мұсылмандары діни басқармасы мен Мысыр Араб Республикасының Әл-Азһар университеті арасындағы екіжақты келісімге сәйкес, қазақстандық имамдар үшін екі айлық онлайн-курс ұйымдастырылған болатын. Діни экстремизмге қарсы біліктілікті арттыруға арналған курсқа 76 имам қатысып, сертификатқа ие болды.
Сертификатқа ие болғандардың арасында жерлесіміз, «Жуалы» көпшілік мешітінің имамы Сейітқазы қажы Медетбеков те бар. Өз сөзінде Сейітқазы қажы Медетбеков осындай керекті дүниелерді ұйымдастырушыларға алғысын жеткізіп, ризашылығын білдірді.
Мақпал САМАТҚЫЗЫ,
«Жаңа өмір»
