Сәрсенбі күні ауданда облыс әкімінің бірінші орынбасары Нұржан Календеров болып, өңірде салынып жатқан бірқатар жаңа құрылыс нысандарының жұмысымен танысты. Н.Календеровке бірінші кезекте Боралдай ауылдық округіне қарасты Ертай ауылында салынып жатқан спорт-сауықтыру кешенінің құрылысы таныстырылды.
Былтыр басталған нысанның құрылысын жүргізіп жатқан мердігер мекеменің өкілдері жалпы ауданы – 36Х12 болатын еңселі ғимараттың ішінде атқарылып жатқан жұмыстардың барысымен таныстырды. Негізі жасалап, іші-сырты жобада көрсетілген қаңылтыр жабындымен қапталған ғимараттың ендігі кезекте, ішкі жабдықтау жұмыстары, оның ішінде, еденін салу, қабырғаларын тиісті темір бұйымдармен нығайту, басқару қызметкерлері отыратын жұмыс кабинеттерінде ішкі әрлеу жұмыстары жүргізілу үстінде.
Нұржан Сәбитұлы келесі кезекте аудан орталығындағы №1 Ш.Мұртаза атындағы мектеп-гимназияның жанынан жапсарлас салынып жатқан екі қабатты ғимарат, атап айтқанда, бірнеше бөлмеден тұратын мектеп шеберханасы және ғимараттың екінші қабатында 300 орынға арналған акт залының құрылыс барысымен танысты. Құрылыс жұмыстарына жауапты мердігер мекеме «Нұр-Тұрсын» ЖШС-ның өкілдері жүргізіліп жатқан нысанның жұмысы аяқталуға таяу екенін айтады. Қазіргі таңда ішкі бөлмелерді әрлеу жұмыстарымен бірге, акт залдың орындықтарын орналастыру, т.б. жұмыстар жүргізілу үстінде. Сәтін салса, ішкі жұмыстар аяқталғаннан кейін ғимараттың ауласын тегістеу, оған асфальт жабындысын төсеу жүргізілмек.
Облыс әкімінің бірінші орынбасары Н.Календеров одан кейін аудан орталығымен іргелес орналасқан Ақсай ауылдық округінің Қайрат ауылындағы 149 орындық мәдениет үйінің құрылыс жұмыстарымен танысты. Айта кету керек, былтыр аяқталуға тиіс мәдениет нысанының құрылыс жұмыстары «сағызша» созылып келеді. Құрылысқа жауапты мердігер мекеменің тарапынан жіберілген олқылықтарды орнына келтіріп, оны уақытында тұрғындардың игілігіне беру жұмыстары жергілікті атқарушы орган басшыларына да оңай болып отырған жоқ. Қазіргі таңда құрылыс жұмыстарын қысқа мерзімде аяқтауға жаңа мердігер мекеменің тарапынан күш салынуда. Облыс әкімінің орынбасары Н.Календеров сондай-ақ, Мыңбұлақ ауылдық округінің орталығы Көлбастау ауылында салынуы тиіс мәдениет үйінің орнымен танысып, ондағы туындап отырған бірқатар проблемаларды да аудан әкімі Жалғас Мұртазамен бірге талқылады.
Өңірде жұмыстар жүргізіліп жатқан жаңа нысандардың құрылысымен танысып, оларды асықпай аралап көрген Нұржан Сәбитұлы, құрылыстардың белгіленген мерзімінде әрі сапалы аяқталуына күш салудың қажеттігін баса атап өтіп, жауапты мердігерлерге бірқатар ескертпелерін айтып, нақты тапсырма берді.
Нұржан Манасұлы,
«Жаңа өмір»
