Мемлекеттік рәміздер күні – Қазақстан халқын біріктіретін ерекше мереке. Мемлекеттік рәміздерде халқымыздың бірлік пен келісімге деген ұмтылысы, елдегі қоғамдық құндылықтар және Отанға деген мақтаныш көрініс тапқан. ҚР Ұлттық қауіпсіздік комитеті Шекара қызметінің Жамбыл ауданы бойынша Шекара басқармасының ұйымдастыруымен мемлекетіміздің ең басты құндылығы 4 маусым – Мемлекеттік рәміздер күніне арналған «Мемлекеттік рәміздер – Тәуелсіздік символы» атты азаматтық тәрбие сағаты өткізілді.
Кеш барысында Әнұран шырқалып, тарихымызға көз жүгіртумен қатар «Бауыржан Момышұлы» шекара бөлімшесі бастығының міндетін уақытша атқарушы, капитан Абылай Орысбай, «Ақсуат» шекара заставасының бастығы, капитан Самат Қайырбеков, «Шөлдала» шекара заставасының бастығы, майор Шыңғыс Омаров жүрекжарды құттықтау сөздерін айтты. Сонымен қатар, ұлттық рухты жанитын патриоттық әндер шырқалды.
Кеш соңында Ш.Уәлиханов атындағы облыстық әмбебап-ғылыми кітапханасының қызметкерлері ҚР Ұлттық қауіпсіздік комитеті шекара қызметінің Жамбыл ауданы бойынша Шекара басқармасына қарасты «Бауыржан Момышұлы», «Ақсуат» және «Шөлдала» шекара бөлімшелерінде 4 маусым – ҚР Мемлекеттік Рәміздері күні мерекесіне орай «Мемлекеттік рәміздер – елімнің мақтанышы» тақырыбында кітап көрмесін ұйымдастырып, библиографиялық шолу жасады.
ҚР Ұлттық қауіпсіздік комитеті шекара қызметінің Жамбыл ауданы бойынша шекара басқармасы бастығының орынбасары, подполковник Данияр Сарымсақов: «Мемлекеттік рәміздер күні – бұл мереке ғана емес, сонымен қатар Мемлекеттік рәміздердің маңыздылығын еске түсіру мүмкіндігі. Олар бізді біріктіреді және ұлттық болмысымызды сақтауға көмектеседі. Қазақстан Республикасының әрбір азаматы өз елінің мемлекеттік рәміздерін білуге және құрметтеуге тиіс. Мекемеде мереке қарсаңында өткізіліп отырған бұл шара барлық қонақтар мен сарбаздардың есінде сақталары сөзсіз. Ең бастысы, Тәуелсіздігіміз тұғырлы, бейбіт күніміз шуақты болсын» деп іс-шараны қорытындылады.
Камила Әбсеметова,
Жамбыл ауданы бойынша Шекара басқармасының кітапхана меңгерушісі
