Basty bet
Сайлау – қоғамдық өмірдің ажырамас бөлігі
республикалық референдумда белсенділік танытқан азаматтар марапатталды
Кеше аудан әкімі аппаратының мәжіліс залында аудандық аумақтық сайлау комиссиясының кеңейтілген кеңесі өтіп, оған сайлау процесін даярлау мен өткізуге жауапты уәкілетті органның басшылары, аудандық қоғамдық кеңес және ардагерлер кеңесінің төрағалары, саяси партиялар мен үкіметтік емес ұйым өкілдері, аумақтық, округтік және учаскелік сайлау комиссияларының мүшелері шақырылды. Жиын барысында Жуалы аудандық аумақтық сайлау комиссиясының 2024 жылдың 9 айында атқарған жұмыстарының есебі тыңдалып, басқа да мәселелер қаралды.
Кеңес жұмысына Жамбыл облыстық аумақтық сайлау комиссиясы төрағасының орынбасары Талғат Жамалов және аудан әкімінің орынбасары Анар Ахметова қатысты.
Кеңейтілген кеңесті аудандық аумақтық сайлау комиссиясының төрағасы Нүрзия Алтыбаева ашып, жүргізіп отырды.
Күн тәртібіндегі бірінші мәселе бойынша аудандық аумақтық сайлау комиссиясының төрағасы Н.Алтыбаева есептік баяндама жасап, ол өз сөзінде, сайлауды ұйымдастыру мен өткізудің әдісі демократиялық қоғамның сұранысына сай бейімделіп келе жатқанын баса айтып, ағымдағы жылдың тоғыз айында атқарылған жұмыстармен бірге, комиссия мүшелерінің кәсіби біліктілігін арттыру бағытында бірқатар жұмыстардың да атқарылғанын айтты.
Кеңес барысында сөз алған облыстық аумақтық сайлау комиссиясы төрағасының орынбасары Талғат Жамалов, комиссия мүшелерін оқыту мен кәсібилендіру, жауапкершіліктті арттыру мақсатында жүйелі жұмыстардың қолға алынғанын айтса, аудан әкімінің орынбасары Анар Ахметова өз сөзінде, сайлаулар кезінде аумақтық сайлау комиссиясы мен аудандық әкімдіктің бірлескен жүйелі жұмысын үлгі ретінде атап өтті.
Айта кету керек, жиын соңында 2024 жылдың 6 қазанында өткен республикалық референдумның барысында белсенділік танытқан комиссия мүшелері мен аудан әкімі аппаратының бірқатар қызметкері ҚР Орталық сайлау комиссиясының, облыстық аумақтық сайлау комиссиясының, сонымен қатар, Жамбыл облысы әкімінің және Жуалы ауданы әкімінің Алғысхаттарымен марапатталды. Марапаттарды Т.Жамалов пен А.Ахметова тапсырды.
Нұржан Манасұлы,
«Жаңа өмір»
