Аудан әкімдігі ішкі саясат бөлімінің қолдауымен және «Нығмет» қоғамдық бірлестігінің ұйымдастыруымен №1 Балалар өнер мектебінде «Болашақ сенің қолыңда» атты сурет байқауы өтті. Байқауға өнер мектептерінен 20 оқушы қатысты.
Әр мектептен 5 оқушыдан 20 қатысушы тіркеліп, оқушылар қоғамда сыбайлас жемқорлыққа қарсы мәдениетті қалыптастыру бағытында сурет салды. Балалардың шығармашылығын арнайы құрылған комиссия бағалап, комиссия құрамында қоғамдық бірлестік өкілі, аудандық білім бөлімі мен Аула клубының қызметкерлері болды.
– Бұл байқаудың мақсаты мен міндеті – сыбайлас жемқорлыққа қарсы қоғамдық мәдениетті қалыптастыру, жемқорлықтың ел дамуына кері әсер ететінін оқушылардың санасына сіңіру, сыбайлас жемқорлыққа қарсы тұру, оның зиянын насихаттау. Сонымен қатар, біз балалардың жемқорлыққа қарсы бейнеленген суреттері арқылы қоғамдық сананы жаңғыртуды көздедік, – дейді «Нығмет» қоғамдық бірлестігінің жетекшісі Шарапат Батырбекқызы.
Байқау қорытындысында комиссия шешімімен жеңімпаздар анықталып, жүлделі І орынды Розалина Ашурова иеленді. Ал ІІ орынмен Алина Ағабек, Інжу Жамалбекқызы, ІІІ орынмен Никита Галахов, Жания Молдахан, Айша Баймахан марапатталып, бағалы сыйлықтарға ие болды. Қалған қатысушылардың барлығы Алғысхаттармен марапатталып, ынталандыру сыйлықтарын алды. Марапаттау рәсімінде Аула клубының суретшісі Мұзафар Өтенов оқушылардың еңбегін бағалауда ұсынылған суреттің байқау тақырыбына сәйкестігі, тақырыптың толыққанды ашылуы, өзектілігі, тартымдылығы басты назарға алынғанын жеткізді.
Сондай-ақ, мәдениет үйінің суретшісі Қойшыбай Төремұратов пен №4 Шақпақ Балалар өнер мектебінің мұғалімі Салтанат Сабырова жеңімпаздарды құттықтап, ұйымдастырушыларға алғыс білдірді.
Лаура МҰСАБЕКОВА,
«Жаңа өмір»
