Дулати университеті Қазақстан мен Индонезия арасындағы академиялық байланысты жаңа деңгейге көтерді

М.Х.Дулати атындағы Тараз университетінің делегациясы Индонезия Республикасының астанасы Джакарта қаласында өткен халықаралық білім беру көрмесіне қатысып, Қазақстанның жоғары білім беру жүйесінің мүмкіндіктерін халықаралық деңгейде таныстырды, деп хабарлайды baq-orda.kz.

Ауқымды іс-шара Қазақстан Республикасы Ғылым және жоғары білім министрлігінің, сондай-ақ Қазақстан мен Индонезия елшіліктерінің қолдауымен ұйымдастырылып, Gandhi Memorial Intercontinental School базасында өтті.

Көрменің басты мақсаты – Қазақстан мен Индонезия арасындағы білім және ғылым саласындағы ынтымақтастықты дамыту, жоғары білім беру бағдарламаларын халықаралық деңгейде ілгерілету, академиялық байланыстарды нығайту және халықаралық серіктестікті кеңейту.

Көрме барысында Дулати университетінің өкілдері бакалавриат, магистратура және докторантура бағдарламаларын таныстырып, оқу орнының ғылыми жетістіктері, халықаралық жобалары, академиялық ұтқырлық мүмкіндіктері және Қазақстанда шетелдік студенттердің білім алу перспективалары жөнінде жан-жақты ақпарат берді.

Университет экспозициясына Индонезия мектептерінің 100-ден астам түлегі, жоғары оқу орындарының студенттері, ата-аналар мен білім беру ұйымдарының өкілдері ерекше қызығушылық танытты. Қатысушыларға қабылдау талаптары, білім беру бағдарламалары, ғылыми тағылымдамалар, халықаралық алмасу бағдарламалары және шетелдік білім алушыларға көрсетілетін қолдау тетіктері туралы толыққанды консультациялар ұйымдастырылды.

Сонымен қатар, көрме қонақтары университеттің ғылыми мектептері, зерттеу орталықтары, халықаралық білім беру жобалары және кәсіби әрі академиялық дамуға бағытталған мүмкіндіктерімен танысты.

Академиялық серіктестік жаңа кезеңге өтті

Халықаралық көрме аясында Дулати университетінің делегациясы Индонезиядағы Риау университеті мен Сұлтан Сиариф Касим атындағы Риау мемлекеттік ислам университетінің басшылығымен ресми кездесулер өткізді.

Кездесулер барысында тараптар көпжылдық ынтымақтастықтың нәтижелерін қорытындылап, алдағы кезеңдегі бірлескен жобалардың басым бағыттарын айқындады.

Айта кету керек, Дулати университеті мен Индонезияның жоғары оқу орындары арасындағы әріптестік 2022 жылдан бастау алады. Сол жылы өзара түсіністік туралы меморандумға қол қойылып, ұзақ мерзімді академиялық серіктестіктің негізі қаланды.

Осы уақыт аралығында индонезиялық профессорлар Дулати университетіне шақырылып, биология, автоматтандыру және педагогика бағыттары бойынша дәрістер оқып, ғылыми-зерттеу жұмыстарын жүргізді.

Ал 2024-2025 жылдары ынтымақтастық ауқымы кеңейіп, білім беру үдерісіне биология, физика, информатика, тарих, химия, географияны оқыту әдістемесі, тұрақты даму, полимәдени білім беру және ағылшын тілін оқыту бағыттары бойынша халықаралық мамандар тартылды.

Шетелдік ғалымдар магистранттар мен докторанттарға ғылыми жетекшілік жасап, бірлескен зерттеулер мен халықаралық ғылыми жарияланымдардың дайындалуына үлес қосты.

2025 жылы академиялық ұтқырлық бағдарламасы аясында Дулати университетінің студенті Риау университетінде білім алып, халықаралық тәжірибе жинақтады.

Қос диплом бағдарламалары іске қосылады

Келіссөздер нәтижесінде тараптар ынтымақтастықты жаңа деңгейге көтеруге уағдаласты.

Алдағы уақытта:

• қос дипломды білім беру бағдарламаларын іске қосу;
• жазғы және қысқы мектептер ұйымдастыру;
• студенттер мен оқытушылардың академиялық ұтқырлығын кеңейту;
• бірлескен ғылыми зерттеулер жүргізу;
• халықаралық ғылыми басылымдарда зерттеу нәтижелерін жариялау жоспарланып отыр.

Сонымен қатар, Дулати университетінің оқытушылары үшін үш халықаралық грант тарту туралы келісім жасалды.

2026 жылдың күзгі семестрінде университет оқытушылары Риау мемлекеттік ислам университетінде «Математика», «Медиакоммуникациялар» және «Полимәдени білім беру және ағылшын тілін оқыту әдістемесі» бағыттары бойынша дәріс оқитын болады.

Халықаралық беделді нығайтқан маңызды қадам

Бүгінде Қазақстан жоғары білімді интернационалдандыру бағытын жүйелі түрде дамытып келеді. Осы тұрғыда Дулати университетінің Индонезиядағы белсенді жұмысы еліміздің академиялық әлеуетін әлемдік білім кеңістігінде ілгерілетуге ықпал етуде.

Сарапшылардың пікірінше, халықаралық серіктестіктің кеңеюі студенттердің жаһандық еңбек нарығындағы бәсекеге қабілеттілігін арттырып қана қоймай, ғылыми зерттеулердің сапасын жаңа деңгейге көтеруге мүмкіндік береді.

Джакартадағы кездесулер мен қол жеткізілген келісімдер Қазақстан мен Индонезия арасындағы білім мен ғылым саласындағы стратегиялық әріптестікті нығайтып, Дулати университетінің халықаралық академиялық кеңістіктегі позициясын одан әрі күшейте түсті.