Құқықтық мәдениет – әділетті қоғамның негіз
Қоғамның дамуы тек экономикалық көрсеткіштермен немесе инфрақұрылымның жаңаруымен өлшенбейді. Оның маңызды өлшемдерінің бірі – азаматтардың заңға деген құрметі, өз міндеттерін түсінуі және өзгенің құқығына жауапкершілікпен қарауы. Осы тұрғыдан алғанда, Конституция қоғамдағы тәртіп пен тұрақтылықты қамтамасыз ететін, мемлекет пен азамат арасындағы өзара жауапкершілікті айқындайтын негізгі құқықтық құжат болып саналады.
Әрбір адамның еркін өмір сүруі, өз қабілетін дамытуы және қоғам өміріне белсенді араласуы үшін оның құқықтары заңмен қорғалуы қажет. Сонымен қатар құқықтармен бірге белгілі бір міндеттердің де бар екенін естен шығармаған жөн. Заң талаптарын сақтау, қоғамдық тәртіпке бағыну, басқа адамдардың ар-намысы мен бостандығын құрметтеу – өркениетті қоғамның басты белгілері.
Құқықтық сауаттылық күнделікті өмірде түрлі жағдайларға дұрыс баға беруге көмектеседі. Мәселен, азамат еңбек шартын жасасу кезінде өзіне тиесілі кепілдіктерді білуі, тұтынушы ретінде заңды талаптарын қоя алуы және қандай да бір даулы жағдайда өз мүддесін заңды жолмен қорғауы тиіс. Мұндай білім адамның құқық бұзушылықтың құрбаны болу қаупін азайтып қана қоймай, мәселелерді өркениетті түрде шешуге мүмкіндік береді.
Бүгінде жас ұрпақтың бойында заңға құрмет пен жауапкершілік сезімін қалыптастырудың маңызы зор. Отбасы мен білім беру ұйымдарында құқықтық тәрбиеге көңіл бөлу, балаларға өз құқықтары мен міндеттерін түсіндіру – болашақта саналы әрі белсенді азамат қалыптастырудың маңызды алғышарты. Өйткені заңды құрметтеу дағдысы адам бойында ерте жастан қалыптасады.
Құқықтық мемлекеттің нығаюы мемлекеттік органдардың қызметімен ғана шектелмейді. Бұл үдерісте әр азаматтың да үлесі бар. Қоғамдық орындардағы тәртіпті сақтау, заңсыз әрекеттерге жол бермеу, өз міндетін адал орындау және ортақ мүддеге жауапкершілікпен қарау – құқықтық мәдениеттің нақты көрінісі.
Заң үстемдік еткен ортада азаматтардың мемлекетке деген сенімі артып, қоғамдық келісім нығая түседі. Сондықтан құқықтық мәдениетті дамыту, Конституция қағидаларын құрметтеу және заң талаптарын күнделікті өмірде басшылыққа алу – әділетті әрі тұрақты қоғам қалыптастырудың маңызды шарты.
