Жуалы аудандық сотында «Бастау» жұмыс тобының 2022 жылдың бірінші тоқсанында атқарған жұмысы бойынша Жамбыл облыстық сотымен аудио-бейнеконференц арқылы кеңес өткізілді.
Іс-шараға аудандық соттың төрағасы Бабырхан Абуев, «Бастау» жұмысы тобының жетекшісі, аудан әкімінің орынбасары Анар Ахметова, аудандық ардагерлер кеңесінің төрағасы Сейітхан Жұмашев, аудан әкімдігі ішкі саясат бөлімінің бас маманы Д.Ормаханов, аудан әкімі аппараты «АХАЖ» бөлімінің бас маманы Динара Қалдыбекова, билер кеңесінің мүшелері Мұратқали Рахметов, Шора Ысқақов, Раушан Алиева, «Отбасылық кеңес» кабинетінің әлеуметтік кеңесшісі Әлия Шамшиева, психологы Айгүл Дәрібаева қатысты.
Жиналыс барысында соттың төрағасы Бабырхан Абуев 2022 жылдың 3 айында атқарылған жұмысы туралы баяндама жасап, отбасы дауларына қатысты істерде татуласқандар саны өткен жылдың ұқсас кезеңімен салыстырғанда 21% пайызға, аудан бойынша (медиация, Билер кеңесінің көмегімен) татуласу арқылы аяқталған істердің саны екі есеге, яғни 25 % пайызға артқанын айта кетті.
Оған қоса, соттың төрағасы отбасылық құндылықтар туралы түсіндірме жұмыстарын өрістету, дау-дамайларды билердің араласуымен шешу, жас-жұбайлар арасында отбасылық қарым-қатынастың берік болуына бағытталған жұмыстарды жандандыру, мерекелер қарсаңында көп балалы аналармен, мектеп түлектермен кездесу, жастар арасында әдеп пен қазақы салт-дәстүрлерді сақтауға және насихаттауға бағытталған жиындар өткізуге шақырды.
Сонымен қатар, сот төрағасы бірнеше ұсыныстар жасады, яғни соттардың басқа аудандардың «Бастау» жұмыс тобымен өзара тығыз қарым-қатынас орнату, АХАЖ бөлімі тарапынан жас отбасылар арасында отбасы құндылықтарын сақтау туралы профилактикалық жұмыстар жүргізу, аудандарда неке қию рәсімін салтанатты түрде өткізетін неке сарайларын салу қажеттігі туралы ойын ортаға салды.
Өз кезегінде «Бастау» жұмыс тобының жетекшісі Анар Ахметова алдағы уақытта дауласқан отбасылар арасында татуластыру рәсімдері одан әрі күшейтілетінін айтты.
Соңында, қатысушылар арасында осы мәселеге қатысты сұрақтар қойылып, мұқият зерделеніп, талданып, осы бағытта ортақ мақсаттар мен өзара іс-қимылдар әзірленді.
