Әлемдік экономикада орын алып жатқан жағдайларды жан-жақты сараптайтын болсақ, оның еліміздің экономикасына қалай әсер етіп отырғанын да анық көріп отырмыз. Дәл осындай сәтте барлығымыздың ауызбірлігіміз, болашаққа деген сеніміміз қажет. Бұл – аса маңызды фактор. Себебі, уақыттың өзі көрсетіп отырғандай, бірлігі жоқ елдердің қандай аянышты жағдайға түсіп отырғанын дәлелдеп жатудың өзі артық.
Алдымызда жауапты саяси науқан тұр. Бұл – Қазақстан Республикасы Президентінің сайлауы. Бұл туралы Мемлекет басшысы Қасым-Жомарт Тоқаев: «Қазіргі геосаяси жағдайда біз мемлекеттілігімізді біртіндеп нығайтып, реформалар мен жаңару бағдарын нық ұстануымыз қажет. Барынша мұқият әрекет жасап, еліміздің ұзақ мерзімді мүддесіне сай жұмыс жүргізуіміз керек. Реформалардың қазіргі қарқынын сақтау, саяси мәселелердің бәрін кейінге қалдырмай шешу аса маңызды. Ол үшін алдағы сайлау кезеңдерін тиімді жоспарлау қажет»,- деді өз сөзінде. Жасыратыны жоқ, ел тарихында болған бұрын сайлаулардың барлығы әділ жолмен өтті деп толық сеніммен айта алмаймыз. Сондықтан, еліміз жаңа кезеңге аяқ басқан тұста қолға алынып отырған алдағы саяси науқанның маңызы бәріміз үшін ерекше болғалы тұрғаны анық.
Сонымен ел Мемлекет басшысының сөзінше, биыл Президент сайлауы, келесі жылы Мәжіліс және мәслихат депутаттарының сайлауы өтеді деп жоспарлануда. Содан кейін Үкіметтің құрамы қайта жасақталады. Соның нәтижесінде 2023 жылдың ортасында Президент, Парламент, Үкімет сияқты негізгі саяси институттардың бәрі қайта жаңғырып, жаңарады. Демек, еліміздің басшылығына жаңа толқынмен бірге жаңа леп келеді деген сөз. Жаңа толқыннан жаңашылдық күтетін халықтық әдетіміз бар. Сол себептен де бұл бағыттағы саяси қадамдар Қазақстанды жаңартуға, ел экономикасын қайта жаңғыртуға бастайтынына күмәніміз жоқ.
Уақыт өтеді, ұрпақ алмасады. Онымен бірге мемлекеттің де, ондағы өмір сүріп жатқан халықтың да келбеті өзгереді. Бірақ, біздің бүгінгі алдымызға қойып отырған жаңа саяси бағыттарымыз өзгермейді. Өйткені, елдің болашақ дамуының да алтын қазығы осынау саяси реформалар екеніне шек келтіруге болмайды.
Алдымызда аса жауапты кезең. Маңызды саяси науқанға бір ел, бір халық болып қатысып, болашаққа дұрыс таңдау жасағанымыз абзал болмақ.
Мейірбек Мәтен,
ардагер журналист.
Ауданның Құрметті азаматы
