№16 Жуалы колледжінде директордың тәрбие ісі жөніндегі орынбасары Рахат Бекбаев «Мамандық таңдау болашаққа нық қадам» атты мектеп оқушыларына ашық есік күнін өткізді.
Аталған шараға ауданға қарасты №29 М.Жұмабаев және №5 М.Ломоносов атындағы орта мектептердің мектеп бітіруші түлектері қатысып, өздерінің болашақтарына қажетті кеңестер ала білді. Шараның мақсаты – мектеп түлектерін аталған колледжге оқуға түскен жағдайда трактор, комбайн, машина секілді ауыл шаруашылығы техникаларының тілін жетік меңгерген маман болуға мүмкіндіктің барын жеткізу.
Сонымен бірге колледждегі басқа да мүмкіндіктер мен жеңілдіктер түсіндірілді. Бүгінгі таңда колледжде тракторшы, машина ісі, тігінші, аспаз т.б басқа мамандықтар негізінде оқып білім алып жатқан жастардың саны жетерлік. Колледже оқып білім алған жастардың көбісі өңірдің дамуына өзіндік үлестерін жан-жақта көрсетуде. Арасында жеке кәсіптерін де ашып, осы игерген мамандығын дамытуда.
Техникалық негізде білім беретін аталған колледжге биыл 200-ге жуық талапкерді қабылдау жоспарлануда. Мұнда өз ісінің мамандары, білікті, тәжірибелі кадрлар жұмыстарын атқарып келеді.
Адам мамандық таңдауда және жар таңдауда қателеспеуі тиіс. Себебі бұ өте маңызды шешім болғандықтан, үлкен жауапкершілікті қажет етеді. Ең бастысы, адам еңбекке қабілетті, зейінді болуы қажет және оның мамандығы өзі өскен ортаға маңызды, қоғамға үлес қосатындай болуы шарт. Сондықтан мамандық таңдауда қателесуге жол бермеген дұрыс. Жан дүниесінің қалауына, ептілігіне, қабілетіне сәйкес мамандықты таңдаған жағдайда діттеген межесіне оңай жете алады. Жылдар бойы қажырлы еңбек етудің арқасында, көпшілікке қажетті маманға айнала алары сөзсіз.
Эльмира СҮЙІНБАЕВА,
«Жаңа өмір»
