Ақбастау ауылының тұрғындары Б.Майлин атындағы орта мектепке 35 жыл мектеп директоры болған Серғазы Алтаевты ерекше құрмет тұтады. Ол орыс тілі пәнінен де сабақ беріп, оқушылардың жүрегіне жол тапқан ұстаз. Өмірлік жары Дариға Садуақасова да Сырдария мемлекеттік университетін Секеңмен қатар бітіріп, екеуі шаңырақ көтеріп, ертеректе Ақбастау ауылына жас ұстаз болып келген.
Бүгінде олардың танымал шәкірттері өте көп. Атап айтқанда, Әл-Фараби атындағы ҚазМУ-де профессор болып жүрген, ғылым докторы Ұлбике Көшербаева, «Түркістан» телеарнасының редакторы Серік Жұмабай,Жамбыл облыс әкімдігі білім беру басқармасы басшысының орынбасары Айдын Досыбаева. Білім саласының мамандары Перизат Қатабаева, Сағын Қатабаев. Кейіннен де талай үздік шәкірттерді тәрбиелеп, ұядан ұшырды.
Серғазы ағай мен Дариға апай ауылға осылайша білімнің нұрлы шамын жақты. Екеуі алтын асықтай ұлдарды, күміс қасықтай қыздарды тәрбиеледі. Бір баласы Ғабит – Тараз қаласы әкімдігі тұрғын үй коммуналдық шаруашылығы, автомобиль жолдары және жолаушылар көлігі бөлімінің басшысы. Өзге ұл-қыздары да ата-ана жолын қуып, ұстаздық жолды таңдады. Сол ұстаздық жолда абыройға бөленіп жүр.
35 жыл мектеп директоры болған Серғазы Алтаевты Ақбастаудың үлкені мен кішісі тегіс құрметтейді. Оны ауданда да ардақтайтындар көп. Себебі, оның 43 жыл бойғы ұстаздық еңбегі абыройын биіктетіп тұрады.
– Ауылым осы. Туған жер төсінде еңбек еттік. Еш жаққа барамыз демедік. Еңбегіміз бен білімімізді туған жерге арнадық. Осы мектепте менің тәлімімді көрген мұғалімдер кейіннен басқа мектептерге директор болды. Осы мектепте білім алған шәкірттерде білім саласында, өзге де салаларда көзге түсті. Ол – мен үшін мақтаныш, -дейді ұлағатты ұстаз Серғазы Алтаев.
– Серғазы Алтаев – түсінген жанға бір ауылдың айбыны, мәртебесі, құрметтісі.Ауданға сіңірген еңбегі елеулі. Өзінің ұлағатты ісімен барша ұстазға, директорларға да үлгі болған жан.
Серғазы Алтаев ақсақалға «Жуалы ауданының Құрметті азаматы» атағы берілсе, нұр үстіне нұр болар еді. Ол құрметке лайықты ардагер ұстаз,- дейді Қарасаз ауылдық округінің әкімі Жанар Нұрмұратқызы.
Есет ДОСАЛЫ,
журналист
