«Жас келсе, іске!» демекші, Шынболат Тұрарбек жастайынан өнер-білімге, спортқа, өз елінің бай табиғатын танып-білуге, оны қорғауға құмар.
Ол Талапты ауылының тумасы. Білімі жоғары. Отан алдындағы борышын Маңғыстау облысы Бейнеу ауданында абыроймен өтеп қайтқан азамат.
Шынболат Тұрарбек 2020 жылдың маусым айынан бастап, аудандық «Жастар ресурстық орталығы» мекемесіне «Жастар тәжірибесі» бағдарламасымен тәжірибеден өтіп, өзін жақсы жағынан көрсетіп, жұмысқа деген қызығушылығы, креативті ойлары басшылық тарапынан қолдау тауып, Мыңбұлақ ауылдық округінің жастар ісі жөніндегі инспектор қызметіне ауысты.
Ол «Әулиеата жастары» өңірлік бағдарламасын жүзеге асыру аясында өңірдегі жастар саясатын барынша қолдап, жастар арасында оны насихаттап жүрген жастардың бірі. Әрбір күнін ерекше өтуіне, діттеген арман-мақсаттарына жетуге күш салуда. Мыңбұлақ ауылдық округіне қарасты Көлбастау, Талапты ауылдарының жастарымен осы уақыт аралығында жүйелі жұмыстар жүргізуде.
-Жастармен етене жұмыстар жүргізу үлкен жауапкершілік жүктейді және нағыз таланттар ауылдан шығады дейді,-Шынболат Жайсанұлы. Сол себепті ауылда тасада, көптің көзіне көрінбей жүрген азаматтардың талантын көпке танытып көрсете білу – үлкен өнер және жауапты жұмыс деп біледі. Сондықтан да жастарды облыстық, аудандық байқауларға қатыстырып, жеңіс тұғырынан көрсетіп, көпке танытуда еңбек етіп келеді.
Жастар ісі жөніндегі инспектор негізінен талантты, дарынды жастармен және пробация есебіндегі, жұмыссыз, Neet санаттағы, жас отбасылармен, психологиялық көмекті қажет ететін, диструктивті дін жолындағы және шет елде діни білім алуға ниетті жастармен жекелей адрестік жұмыстар жүргізіп, мектеп психологымен ерекше қиын жағдайға тап болған және аудандық полиция бөлім қызметкерлерімен, мектептің тәрбие және құқықтық орынбасарларымен түнгі рейдттік жұмыстарын жүргізумен айналысады.
Шынболат мекеме жанынан құрылған «Әкелер», «Жас ұлан» әскери патриоттық, «Жас ақындар», «Жуалы – еркін ойлар алаңы» «Жас жайдарманшылар» клубтарына жан-жақты талантты, өнерлі жастарды жинақтаумен олардың жұмыстарын көрсетуде.
Маманның болашақтағы алға қойған арман-мақсаттары – жастарды қолдау, өзін кәсіби біліктілігін одан әрі жетілдіру, дамыту.
Шынболат Тұрарбек өз жұмысындағы белсенділігі үшін көптеген марапаттарды иеленді. Атап айтқанда, аудан әкімі Ж.Мұртазаның, Жастар саясаты мәселелер басқармасының басшысы Ж.Зұлпыхардың және аудандық мәслихаттың, «АMANAT» партиясының Алғысхаттары.
Жастар – еліміздің болашағы, қоғамның қозғаушы күші. Олардың өршіл рухтары, білімі, жұмысқа деген қарым-қабілеті қоғамды алға қарай жылжыта түспек. Оларды қолдап, барынша дұрыс бағдар беру маңызды. Бүгінгі таңда жастардың кез келген салада, кез келген ортаға бейімделіп, өз орнын табуына мүмкіншіліктер көп.
Эльмира СҮЙІНБАЕВА,
«Жаңа өмір»
