Соңғы жылдары ауданымызда ит қапқаннан зардап шеккен адам саны біртіндеп азаюда. 2023 жылдың 12 айында ит қапқаннан зардап шегіп антирабикалық көмекке жүгінген 166 адам, 100 мың халыққа шаққанда көрсеткіші – 304.3 %. 2022 жылдың 12 айында ит қапқаннан зардап шегіп антирабикалық көмекке жүгінген 195 адам, 100 мың халыққа шаққанда көрсеткіші – 367.8 %.
2022 жылдың 12 айымен салыстырғанда, ит қапқаннан зардап шегіп антирабикалық көмекке жүгінген адам 29 жағдайға төмендеп отыр. 100 мың халыққа шаққанда көрсеткіші -53, 1%. Барлық зардап шеккен адамдарға, аудандық орталық аурухананың ота бөлімінде және аудандық орталық емханада құтыруға қарсы антирабикалық екпе жасалады. Жедел вирусты аурулардың ең қатерлісінің бірі-құтыру ауруы. Егер дер кезінде ем алмаған жағдайда, ауырған адам ми қабынуынан қайтыс болады. Құтыру ауруы – ауырған жануарлар тістегенде, тырнағанда немесе терінің жарақаттанған жеріне сілекейі жағылуы арқылы адамға жұғады, (60-70%) инфекцияның көзі иттер болып табылады.
Құтырманың табиғи ошақтары қасқырлар, түлкілер, шибөрілер және басқа да жануарлар болған жерде қолдау табады, олардан инфекция үй жануарларына және кезбе иттерге жұғады. Аурудың бірінші белгісі ұстама, аяқ астынан, кез келген тітіркендіргіштер әсерінен басталады: судың аққан сылдырын естігенде, біреу қатты сөйлегенде, соққан жел мен тым жарқыраған жарық әсерінен, науқастың мазасы кетіп, қорқыныш, үрей пайда болады, дем алуы қиындайды. Бір екі күн өткен соң сілекей ағуы көбейіп азаптанады, ауру сілекейін жұта алмайды, үнемі түкіріп отырады немесе аузынан еріксіз сілекей ағады.
Ауру жүрек не тыныс жұмысын басқаратын ми орталықтарының зақымдануынан 6-8 күн ішінде, өте сирек жағдайда 1-ші күні өледі. Құтыруды емдейтін арнаулы ем жоқ. Сондықтан жануар тістеген жағдайда, адамдарды аурудан арашалап қалатын жалғыз жол – құтыруға қарсы емдеу-профилактикалық егу шаралары.
Жануарлар тістеген жағдайда, міндетті түрде дәрігерге қаралыңыз! Өз өміріңіз – өз қолыңызда!
Марат Искаков,
аудандық санитариялық-эпидемиологиялық бақылау
басқармасының басшысы
