Қашанда қарттарын қазынаға балаған қазақ халқы солардың ақ баталарының арқасында көгеріп-көктеген, өсіп-өркендеген. Бүгінгі мақаламызға арқау болғалы отырған жандар расында өсіп-өнген, өріс кеңейткен мерейлі отбасы. Жапырақ жайып, мәуелі баққа айналған отбасының отағасы Әділхан Нұрымбетов өмірлік серігі, 45 жыл отасқан жары Ақсан Бағбергенова екеуі де Қызылорда облысы Қазалы ауданының тумасы. Олар бір ауылда өсіп, бір сыныпта парталас болған. Сол кездері мектепті бітірген түлектерді еңбекке баулу мақсатында екі жыл ауылда күріш теруге жіберіледі екен. Екі жылдан кейін Ақсан Бағбергенова медициналық училищеге оқуға түсіп, оқуды тамамдаған соң екеуі 1976 жылы шаңырақ көтереді.
Ақсан Бағбергенова еңбек жолын Қазалы ауданындағы ауруханада медбике болып бастаған. Тұрмысқа шыққаннан кейін Қазалы ауылындағы ауруханада жұмыс жасайды.
1992 жылы олар отбасымен Жуалы ауданының Көлбастау ауылына көшіп келеді. Отанасы аудандық орталық аурухананың жұқпалы аурулар бөлімінде жұмысын жалғастырады. 1998 жылы денсаулығына байланысты екінші топ мүгедектік алып жұмыстан босап, соған қарамастан орталық базарда сауда-саттықпен айналысып, бүгінде сол еңбегінің жемісін көріп отыр.
Ал, отағасы Әділхан Нұрымбетов бар өмірін құрылыс саласына арнаған. Тынымсыз еңбек пен табандылықты қажет ететін оның жұмысы бір сәтке болсын тоқтаған емес. Осылайша, зейнет жасына жеткенше құрылысшы болып еңбек еткен.
Әке тәлімімен есейген ұлы Айбек те құрылыс саласында жұмыс жасайды. Отағасы мен отанасының көрген қызықтары мен көкейге түйген құнды дүниелері бір кітапқа жүк боларлық. Осы бір қазыналы қарттардың қатар отырып, қуанышқа кенелуінің өзі Алланың сол әулетке берген ризық-несібесі шығар.
Ұлағатты ұрпақ өсіріп, өнегелі әулетке айналған осы бір мерейлі отбасының шаңырағынан қонақ үзілген емес. Еске түсер елеулі күндерді былай қойғанда, жай күндердің өзінде босағасынан қонақ арылмайтын құтты шаңырақтың қазіргі тату тірлігі көптеген жас отбасыларға үлгі боларлық. Бұл отбасында бір ұл, төрт қыз өмірге келген. Олар бүгінде әр салада абыройлы еңбек етіп жүр. Қыздарының барлығы тұрмыста түрлі салада жұмыс атқаруда. Әулетте жалғыз ұлы Айбек пен келіні Жанар қара шаңырақта тұрады. Олардың бес қызы бар.
Қара шаңырақтың келіні Жанармен әңгімелесу барысында оның өз ата-енесін сыйлап, құрметтейтіні әр сөзінен айқын аңғарылып тұрды. Мұндай ұяңдық әрбір қазақ шаңырағындағы келіндердің бойынан табылса игі…
Наурыз мерекесінде наурызкөже дайындап, барлық немерелер мен жиендер қара шаңыраққа жиналады. Отбасы толық жиналғанда үй-іші думанға толады. Ынтымағы жарасқан Нұрымбетовтер отбасының көрсетер өнегесі мол.
Үлкендердің үлгі-өнеге көрсетуімен бұл отбасында адамгершілік пен сүйіспеншілікке тәрбиелейтін өзара құрмет пен сыйластық қалыптасқан. Нағыз қазақтың салт-дәстүрі мен дарқан көңілін шын ниетімен ұлықтаған шаңырақ деп айтуға болады. Туған-туыстары мен жолдастарының арасында әр қазақтың санасына сәуле шашып, ой тастап, салт-дәстүрімізді, асыл дінімізді дәріптеп жүрген ақ жаулықты ана Ақсан әжені мақтан етеміз.
Міне, осылайша еңбекке бас иген әулеттің ұрпақтары да бүгінде өсіп-өніп, бір-бір отбасына айналып отыр. Ата-ана үшін балаларының осындай өмір жолын көріп, одан қуаныш табуынан өзге бақыт жоқ шығар сірә?! Бүгінде Нұрымбетовтар әулетінде 24 немере желкілдеп өсіп келеді.
Ендеше, осынау халықтық қағиданы мықтап ұстанған отбасылардың қатары арамызда көбейіп, олардан саналы ұрпақ өрби берсін!
Лаура МұсабекоВА,
«Жаңа өмір»
