Қоғамның тұрақты дамуы мен елдің өркендеуі ең алдымен заң мен тәртіптің сақталуына тікелей байланысты. Құқықтық мемлекет құру жолында заңның үстемдігі мен азаматтардың құқықтық мәдениеті ерекше маңызға ие. Заң – қоғамдағы қоғамдық қатынастарды реттейтін негізгі құрал болса, тәртіп – сол заң талаптарының орындалуын қамтамасыз ететін маңызды фактор.
Заңның басты мақсаты – азаматтардың құқықтары мен бостандықтарын қорғау, әділдік орнату және қоғамдық қауіпсіздікті қамтамасыз ету. Егер заң талаптары сақталмаса, қоғамда бейберекетсіздік орын алып, адамдардың бір-біріне деген сенімі әлсірейді. Сондықтан әрбір азамат заңды білуге, оны құрметтеуге және сақтауға міндетті.
Тәртіп – жеке адамның ғана емес, бүкіл қоғамның мәдениетінің көрсеткіші. Тәртіп сақталған жерде жауапкершілік, ұйымшылдық және өзара сыйластық қалыптасады. Әсіресе жастар арасында тәртіптілік пен заңға бағынушылық қасиеттерін қалыптастыру – маңызды міндеттердің бірі. Бұл бағытта отбасы тәрбиесі, білім беру жүйесі және қоғамдық ұйымдардың рөлі зор.
Сонымен қатар, құқық бұзушылықтың алдын алу – мемлекеттік саясаттың басты бағыттарының бірі болып табылады. Бұл үшін тек жазалау шараларын күшейту жеткіліксіз. Ең алдымен, құқықтық сауаттылықты арттыру, азаматтардың құқықтары мен міндеттері туралы түсіндіру жұмыстарын жүргізу қажет. Қоғамда заңға деген құрмет қалыптасқанда ғана құқық бұзушылық деңгейі төмендейді.
Қорытындылай келе, заң мен тәртіп – мемлекеттің беріктігінің кепілі. Әрбір азамат заң талаптарын сақтап, қоғамдық тәртіпті бұзбауға тырысса, елімізде бейбітшілік пен тұрақтылық нығая түседі. Заңға құрмет – елге деген құрмет екенін ұмытпауымыз қажет.
Жуалы ауданы Сот әкімшісі басшысы
Самат Ералиев
