«Достық» мәдениет үйінде облыстық аумақтық сайлау комиссиясының ұйымдастыруымен «Қазақстан Республикасының Президентін сайлау науқанын өткізу кезіндегі сайлау процесінің құқықтық негіздері және сайлау комиссиясының жұмысын ұйымдастыру» тақырыбында семинар-кеңес өтті.
Оған ауылдық округтердегі сайлау учаскелерінің комиссия құрамы мен ауылдық округ әкімдері қатысты.
Семинар-кеңесті аудан әкімі Нарбай Ергебеков ашып, сөз кезегін облыстық аумақтық учаскелік сайлау комиссиясының төрағасы Серғали Айдапкеловке берді.
-Бүгінгі семинар-кеңестің мақсаты – жалпыхалықтық сайлау Президент сайлауының ерекшеліктерін, «Қазақстан Республикасындағы сайлау туралы» Заңға енгізілген өзгерістер мен толықтыруларды түсіндіру.
Мемлекет басшысы Қасым-Жомарт Тоқаев 9 сәуір күнгі Қазақстан халқына Үндеуінде «Қазақстан – демократиялық мемлекет. Президент халықтың таңдауымен сайланады.
Мен, Мемлекет басшысы ретінде, сайлаудың таза, ашық әрі әділ өтуіне кепілдік беремін! Бұл – менің берік ұстанымым!» деген болатын. Сондықтан біз комиссия мүшелері сайлаудың заң аясында ашық әрі әділ өтуіне жауаптымыз.
«Қазақстан Республикасындағы сайлау туралы» Заңға енгізілген өзгерістер мен толықтырулардың бірі – мүмкіндігі шектеулі азаматтардың сайлау құқықтарын қамтамасыз ету жөніндегі ұсынымдар. Яғни, мүмкіндігі шектеулі азаматтардың дауыс беру орнында денсаулығына қарай қажетті құрал-жабдықтармен қамтамасыз етілуі. Міне, осы және тағы да басқа маңызды мәселелер бар. Сол себептен, біз сіздермен арнайы кездесіп, қажетті мағлұматтарды беруге, сұрақтарыңызға жауап беруге келіп отырмыз,- деді Серғали Өмірзақұлы.
Семинар-кеңестің негізгі бөлімінде облыстық -аумақтық сайлау комиссиясының мүшесі Талғат Жамалов барлық сұрақтарға кеңінен, сайлау кезінде өз тәжірибесінде орын алған жағдайлар және олардан қалай шығуға болатындығын жан-жақты түсіндірді.
Семинар барысында қатысушылар Талғат Жамаловқа көкейлерінде жүрген сұрақтарын қойып, көптеген қажетті мағлұматтармен қанықты.
Перизат Шымыртайқызы.
Суреттерді түсірген
Сәбит КҮЗЕМБАЕВ,
«Жаңа өмір»
