Кеше аудан орталығындағы тарихи-өлкетану музейінде «Nur Otan» партиясы Жамбыл облыстық филиалы төрағасының бірінші орынбасары Дауыл Бейсенқұлов пен орынбасары Мәди Мәтен аудандағы партия активімен кездесу өткізді.
Кездесуге БАҚ өкілдері, аудандық мәслихаттағы депутаттық фракция мүшелері, саяси кеңес мүшелері және бірқатар бастауыш партия ұйымының төрайымдары шақырылды.
Кездесуді партияның аудандық филиалы төрағасының бірінші орынбасары Анар Ахметова ашып, сөз кезегін Дауыл Бейсенқұловқа берді.
Дауыл Ынтықбайұлы «Nur Otan» партиясының сайлауалды бағдарламасын жүзеге асыру мақсатында жасалған “Жол картасындағы” негізгі бағыттарға тоқталды. Сонымен бірге “Жол картадағы” жұмыстарды жүзеге асыруға арналған жұмыс алгоритмі жасалатынын айтып, партия активін партияның беделін көтеруде үлкен жауапкершілікпен жұмыс атқаруға шақырды.
Сондай-ақ, сайлау науқанына белсене атсалысқан бірқатар партия мүшелеріне партия Төрағасы Нұрсұлтан Назарбаевтың және Бірінші орынбасары Бауыржан Байбектің Алғысхаттарын тапсырды.
Кездесуге қатысушылардың атынан аудандық мәслихаттың хатшысы Ерғали Тілеубеков сөйлеп, ел мүддесі жолында нұротандықтар өздеріне жүктелген жауапкершілікті абыроймен атқаратынына сенім білдірді.
Кездесуді Дауыл Бейсенқұлов қорытындылады.
Перизат ШЫМЫРТАЙҚЫЗЫ,
«Жаңа өмір»
