Кеше Тараз қаласында “Достық” үйінде “Қайырымдылық керуені” ІІІ республикалық байқауының лауреаттарын марапаттау рәсімі өтті.
ҚР Тұңғыш Президенті Нұрсұлтан Назарбаев Қорының бастамасымен Қазақстан Іскер әйелдер қауымдастығының, “Хабар” АҚ, КТК агенттігінің қолдауымен өткізіліп жүрген “Қайырымдылық керуені” республикалық конкурсы қазақстандық қоғамда қайырымдылық, жомарттық пен белсенді азаматтық бастамаларды насихаттауға бағытталған.
Жамбыл облысының әр аумағынан республикалық конкурсқа “Асар”, “Туған жер”, “Батыл жүрек”, “Мейірім жолында”, “Қайырымдылық тарихы” сынды бес номинация бойынша 42 азамат қатысты. Олардың бесеуі топ жарып, жеңімпаз атанды.
Наурыз мейрамы қарсаңындағы шара “Қазақ биімен” басталды.
Салтанатты шараны облыс әкімдігі ішкі саясат басқармасы басшысының орынбасары Мақпал Сатыбалдықызы ашып, конкурсқа қатысушыларды Наурыз мейрамымен құттықтады. Конкурстың мақсатын айта келіп, жүлдегерлер мен лауреаттарды марапаттау рәсімін бастады.
Сонымен бірге Жамбыл облысы іскер әйелдер қауымдастығының төрайымы Меруерт Лештаева да игі тілегін білдірді.
-Ел Тәуелсіздігінің 30 жылдығында біз мемлекетіміздің дамуына үлес қосып жүрген еріктілерді, кәсіпкерлерді, меценаттарды, әр саладағы мамандық иелеріне құрмет көрсетіп, алғыс білдірудеміз.
Конкурстың мақсаты – қоғамдағы атымтай жомарт, қайырымды, мейірімді жандарды үлгі ету, – деді Меруерт Лештаева.
Жүлдегерлердің арасында “Туған жер” номинациясы бойынша күміс жүлдегер атанған “Altais groop” ЖШС-ның басшысы, облыстық мәслихаттың депутаты, меценат Әлімбек Жұмабаев та бар.
Жүлдегерлердің марапатынан кейін белсенді азаматтық ұстаным танытушылар, өзекті және түйткілді мәселелерді көтерушілер, қайырымдылықты насихаттап, адамдарға риясыз көмек қолын созушы жандарды, яғни байқау лауреаттары марапатталды.
Республикалық байқау лауреаттарының қатарында Жуалы ауданынан аудандық “Жаңа өмір-Новая жизнь” қоғамдық-саяси газетінің ұжымы, кәсіпкер Күлбақыт Айтқұлова, аудандық №7 Өрт сөндіру бөлімінің бастығы, көпбалалы әке Кеңесбек Абдраимов, “Темірбеков” ШҚ жетекшісі Нұрбол Темірбеков, “Бурный сүт компаниясы” ЖШС директорының орынбасары Әбдібек Пошқаев бар.
Байқау лауреаттарына Нұрсұлтан Назарбаев қорының директоры Дариға Назарбаеваның Алғысхатымен және сыйлықтар тапсырылды.
Перизат Шымыртайқызы,
«Жаңа өмір»
