Дәл Тәуелсіздік мерекесі қарсаңында аудандық «Достық» мәдениет үйінде 1986 жылғы желтоқсанда Алматыдағы орталық алаңдағы көтерілісте қыстың ызғарлы аязында тоңып, көптің қарсылығына үн қосқан бірқатар желтоқсаншы азамат лайықты марапатқа ие болды.
Айта кету керек, әуел баста ауданда «осы көтеріліске қатыстым, орталық алаңда немесе басқа қаладағы жастар тоқуының куәсі болдым» деген азаматтардың қатары аса көп емес еді. Арада біршама уақыт өткенде бұл оқиғаға жариялылық сипат берілуі, көтеріліске қатысқандардың ақталып, мемлекет тарапынан түрлі жеңілдіктерге ұсынылуы олардың көңіліне үміт сыйлады.
Аудан әкімі Олжас Қаржауов жиналған қауымды ұлық мереке – Тәуелсіздіктің 30 жылдығымен құттықтай отырып, Желтоқсан оқиғасының мемлекет тарихындағы рөліне тоқталды. Одан соң басқосуға арнайы келген оқиға куәгерлерін кезекпен сахна төріне шақырып, кеуделеріне «Желтоқсан» қоғамдық бірлестігі дайындаған «Желтоқсан көтерілісі» медалін тақты.
Абылайхан СӘРСЕН,
«Жаңа өмір»
