Алғыс күні – тарихтың түрлі кезеңдерінде қазақ халқының бауырмалдығына бөленген түрлі этнос өкілдерінің қазақ жері мен қонақжай қазақ халқына деген терең тағзымның белгісі.
Тәуелсіз елімізде 130-дан аса этнос өкілдері бір шаңырақ астына топтасып, біртұтас Қазақстан бірегей артықшылықтарға ие болды.
Сондықтан да, Алғыс айту күнін – қазақстандық патриотизм мен ынтымақтың, бірлік пен достықтың жарасқан күні деуге толықтай негіз бар. Атаулы күн 2016 жылдан бері аталып өтуде.
Бұл күн, ең алдымен – тыныштық пен үндестік, бейбітшілік пен келісімнің салтанат құрған күні.
Алғыс айту күні мерекесіне орай аудан әкімінің орынбасары Анар Ахметова сан-сала қызметкерлеріне алғыс айтты. Олардың қатарында өңірдегі жаппай тәртіпсіздік және төтенше жағдайлар кезінде өзінің қызметтік міндетін адал атқарып, қоғамдық қауіпсіздікті сақтауда ерекшеленген полиция, төтенше жағдай, білім беру және денсаулық сақтау саласының қызметкерлері мен Қазақстан халқы Ассамблеясының мүшелері және донорлар бар.
Мерекелік жиынды аудан әкімінің орынбасары Анар Садыққызы ашып, жүргізді.
– Бүгінде біздің қасиетті Жуалы жерінде 11 этнос, 5 этномәдени бірлестік өкілдері Ассамблея құрамында бірлік пен татулықта өмір сүруде.
Көпұлттылық – біздің басымдығымыз, бірлік – сарқыламас байлығымыз. Алғыс айту күні – қайырымдылық дәстүрлерін, әлеуметтік ынтымақты және өзара көмек көрсетуді қолдау күні.
Бір-біріне деген ізгі тілектері мен лебіздерін, ақжарма алғыстарын білдіруі керек.
Бұл жақсылықты бағалай білуге, оған жақсылықпен жауап қайтаруға, өзара сыйластық пен құрметке бастайды.
Баршамыз үшін тыныштықтан асқан байлық та, бақыт та жоқ. Бұның құнын жыл басындағы қаңтар оқиғасы дәлелдеп берді. Президентіміз бастаған жаңа Қазақстан құрудағы ең басты құндылығымыз – бейбітшілік пен біртұтастық, – дей келіп Анар Садыққызы бір топ жуалылықтарды аудан әкімінің Алғысхаттарымен марапаттады.
Жиын барысында аудандық ардагерлер кеңесінің төрағасы Естемес Аманбеков пен аудандық қоғамдық кеңестің төрағасы Сейітхан Жұмашев игі тілектерін білдірді.
Аудан әкімінің баспасөз қызметі
