Қазақстан Республикасының президенттігіне кандидат Жигули Дайрабаев Маңғыстау облысының жұртшылығымен жүздесті. Ең әуелі кандидат Мұнайлы ауданында орналасқан «Сауқымбек» ұн тарту зауытының ұжымымен кездесті.
Бірнеше жыл бұрын іске қосылған өндіріс ошағы жоғары сұрыпты ұн өндіріп, 70-ке жуық адамды тұрақты жұмыспен қамтамасыз етіп отыр. Зауыт алдағы уақытта дайын өнімді экспорттауға ниетті. Алайда кей кезде кәсіпорынға бидай жеткізуде қиындықтар туындайды, вагондар тапшылығы байқалады.
«Қазақстандағы аграрлық сектордың негізгі бір саласы егін шаруашылығы екені белгілі. Еліміздің солтүстік, орталық өңірлеріндегі алқаптар тұтастай республиканы астықпен қамтамасыз етуге, тіпті, дәнді дақылдарды шет елдерге экспорттауға мүмкіндік береді. Дегенмен ел ішінде туындаған осындай проблемалар кәсіпкерлердің жұмысына кері әсерін тигізіп отыр. Үкімет, министрліктер, ұлттық компаниялар вагон тапшылығы мәселесін шешуі керек. Отандық фермерлер мен қайта өңдеушілердің мүдделерін қорғау жолында көздеген мақсатымыздан тайынбауымыз қажет. Қазақстанда тауарлар қорын құру стратегиясында азық-түлік нарығын дамыту және қауіпсіздігін сақтау бәрінен бұрын импортқа тәуелді емес, отандық өндіріс есебінен жүзеге асуы керек», деді Жигули Дайрабаев.
