Бейсенбі күні аудандық орталық кітапхананың «Білім» орталығында атом электр стансасын салу жөнінде өткен жалпыұлттық референдумның қорытындысына байланысты марапаттау жиыны өтіп, аса маңызды саяси шараның қарсаңында аудандық халықтық штабтың құрамында белсене жұмыс істеп, өңір тұрғындарына АЭС салу жөнінде сауатты ақпарат берумен бірге, оларды жарқын болашақ жолында дұрыс таңдау жасауға шақыруда аса белсенді жұмыс істеген азаматтарға марапат тапсырылды.
Жиында алғашқы сөз «АМАNАТ» партиясы аудандық филиалының төрағасы Марат Нарымбековке берілді.
-Сіздерді ең алдымен ұлттық мереке – Республика күнімен шын жүректен құттықтаймын! Мемлекет басшысы Қасым-Жомарт Тоқаевтың Жарлығымен қайта тұғырына қонған бұл ұлттық мерекенің ел өміріндегі маңызы өте зор. Мереке барлығыңызға қуаныш алып келсін.
Қалың көпшілікке белгілі болғандай, ағымдағы жылдың 6 қазан күні Қазақстан Республикасында атом электр стансасын салу жөніндегі жалпыұлттық референдумның өткені белгілі. Айта кету керек, онда Қазақстан халқы тағдыршешті шешім қабылдап, елдің экономикалық және энергетикалық қауіпсіздігі мен жас ұрпақтың жарқын болашағы үшін дұрыс таңдау жасады. Ел өміріндегі осынау маңызды саяси шараның жоғары деңгейде өтуіне атсалысқан барлық азаматқа өз атымнан және партияның атынан үлкен алғыс білдіремін. Ел аман, жұрт тыныш болып, әрбір отбасында амандық пен бақ-береке болсын,- деді Марат Аманғалиұлы.
Кезек марапаттауға беріліп, онда ең алғаш болып жалпыұлттық референдум қарсаңында аудандық халықтық штабтың ең белсенді мүшесі ретінде жұмыс істеген «Ардагерлер ұйымы» РҚБ-ның аудандық филиалының төрағасы Сейітхан Жұмашев Қазақстан Республикасы Парламенті Мәжілісінің Төрағасы Ерлан Қошановтың Құрмет Грамотасымен марапатталды. Мәжілістің Алғысхатына аудандық мәслихаттың төрағасы Зиядхан Бүрлібаев ие болды.
Сондай-ақ, белсенді азаматтардың үлкен тобы «АМАNАТ» партиясының Атқарушы хатшысы Д.Кәрібектің қолы қойылған Алғысхаттармен марапатталса, бірқатар азаматқа «АМАNАТ» партиясының облыстық және аудандық филиалдарының Құрмет грамотасы мен Алғысхаттары берілді.
Марапаттарды «АМАNАТ» партиясы аудандық филиалының төрағасы Марат Нарымбеков және аудандық мәслихаттың төрағасы Зиядхан Бүрлібаев тапсырды.
Нұржан МАНАСҰЛЫ,
«Жаңа өмір»
