Бұл жетістіктің артында ел ішінде жүргізілген сан-салалы жұмыстар, жүйелі мемлекеттік саясат пен азаматтық қоғамның белсенділігі жатыр. Осы үдерістің жүрегі іспетті мекемелердің бірі – Жамбыл облысындағы «Достық үйі».
Бұл үй – жай ғана ғимарат емес, бұл – 87 этнос өкілінің басын қосып отырған үлкен рухани орта. Мұнда түрлі ұлт өкілдері мәдени бағдарламалар, фестивальдер, көрмелер мен дөңгелек үстелдер арқылы бір-бірін танып, бірін-бірі құрметтеуге үйренеді. Биыл Қазақстан халқы Ассамблеясының 30 жылдық мерейтойы аясында «Достық үйінде» 60-тан астам ауқымды шара өтті.
Олардың қатарында этносаралық келісімді насихаттауға бағытталған «Қазақстан халқы Ассамблеясының тарихы мен жетістіктері» көрмесі, «Бірлік пен келісімнің 30 жылы» атты фестивальдің облыстық іріктеу кезеңі, қайырымдылық және әлеуметтік жобалар, жастармен кездесу кештері бар.
Сондай-ақ, мұнда құрылған «Жомарт жан» орталығының белсенділігі ерекше. Қайырымдылық көмектері, мұқтаж жандарға қолдау көрсету, әлеуметтік осал топтарға көмек – осы орталықтың күнделікті жұмысына айналған.
«Достық үйі» – халықтар арасындағы шынайы достықтың куәсі. Бұл үйдің қабырғасында өтіп жатқан әрбір іс-шара – елдің болашағына бағытталған рухани инвестиция.
