Әрбір халықтың өмірінде дін мен мәдениеттің орны ерекше. Дін – адамды рухани тазалыққа жетелейтін шамшырақ болса, мәдениет – сол ізгіліктің күнделікті өмірдегі айқын көрінісі. Бұл екеуі тарих сахнасында бір-бірін толықтырып, қоғамның дамуына серпін беріп келеді.
Қазақ халқы Ислам дінін қабылдағаннан бері ғасырлар бойы рухани тұрғыда кемелденіп, өз болмысын сақтап келеді. Ислам бізге адалдықты, әділдікті, мейірімділікті үйретті. «Адамдардың ең жақсысы – өзгелерге пайдасы тигені» деген қағидат қазақтың қонақжайлық, қайырымдылық дәстүрлерімен үйлесіп, ұлттық мінезіміздің негізіне айналды.
Мешіттер – тек құлшылық орны емес, білім мен ағартушылықтың да ошағы болды. Аталарымыз балаларын медресеге беріп, дін арқылы сауатын ашты. Демек, дін – адамды тек құдайға құлшылық етуге емес, білім іздеуге, еңбек етуге, қоғамға қызмет етуге тәрбиелейді.
Мәдениет – халықтың ғасырлар бойы қалыптасқан тілі, өнері, әдет-ғұрпы, салт-дәстүрі. Қазақ мәдениеті – кең даламыздың кеңдігімен, халқымыздың дархандығымен астасқан. Домбыра күмбірі, жыраулар жыры, ұлттық ойындарымыз, асыл дәстүрлеріміз – бұлардың барлығы ұлтымыздың рухани байлығы.
Әрбір дәстүріміздің түпкі мәніне үңілсек, оның дінмен астасып жатқанын көреміз. Мәселен, жетім-жесірге жәрдем беру – әрі мәдениетіміздің бөлшегі, әрі дініміздің парызы. Үлкенді құрметтеп, кішіге қамқор болу – қазақ болмысының да, ислам құндылықтарының да негізі.
Дін мен мәдениет – қоғамның тұтастығын сақтаушы қос тірек. Егер мәдениетсіз дін болса, ол тереңдігін жоғалтады; ал дінсіз мәдениет болса, ол мәнін жоғалтады. Сондықтан халқымыз бұл екеуін әрқашан үйлестіріп, бір-бірінен ажыратпай сақтап келді.
Ұлттық мәдениетімізді жаңғырту арқылы біз ұрпаққа тарихымызды танытамыз, ал діннің тәрбиелік мәнін жеткізу арқылы олардың жүрегіне имандылық дәнін себеміз. Бұл – болашағымыз үшін аса қажет.
Бүгінгі жаһандану заманында жастардың ұлттық болмысын сақтау – басты міндет. Әлемдік ақпарат ағымында өз мәдениетімізді жоғалтып алмау үшін дәстүрлі құндылықтарды дәріптеуіміз керек. Дінімізді дұрыс түсініп, мәдениетімізді құрметтегенде ғана біз ұлт ретінде бірлігімізді сақтап, келешекке нық қадам басамыз.
Біз – ата-бабамыздан мұра болған асыл дін мен бай мәдениеттің иесіміз. Осы рухани байлықты сақтау, ұрпаққа жеткізу – баршаның ортақ парызы. Елдің ынтымағы мен татулығы осы құндылықтарға негізделеді.
Нұрбақыт Балтабаев,
Шақпақ ауылдық
округінің әкімі
