Кеше Б.Момышұлы ауылы әкімінің аппараты және ардагерлер кеңесінің мүшелері, округ әкімінің жанынан құрылған билер кеңесінің мүшелері «Несібелі» мейрамханасында дастарқан жайып, былтыр Қаңтар оқиғасы кезінде құрбан болған азаматтардың рухтарына және әруақтарға арнап Қасиетті Құран аяттарын бағыштады.
Ең алдымен «Жуалы» көпшілік мешітінің имамы Сейітқазы қажы Медетбек Құран аяттары мен дастарқаннан болған сауаптарды былтыр қасіретті әрі қанды Қаңтар оқиғасы кезінде оққа ұшқан немесе мемлекеттің қауіпсіздігі мен қасиетті Отанның тыныштығын күзету кезінде қаза тапқан азаматтардың рухына бағыштаса, ауданның құрметті қариясы Әбілқасым қажы Ергебеков дастарқанға бата берді.
Дастарқан басында аудандық ардагерлер кеңесінің төрағасы Сейітхан Жұмашевқа, ардагерлерден – Әбдімәжит Дәуренов, Орынбай Алмағамбетов, Кәрібай Құрмашев, Дәулетжан Байдалиев, Мұратқали Рахметовке және Бауыржан Момышұлы ауылының әкімі Керімхан Төреқұловқа сөз беріліп, көпті көрген аға буын ардагерлер ел бірлігінің, халықтар достығының және мемлекетте тұрақтылық пен тыныштықтың салтанат құруын ең асыл қасиет екенін айтып, Отан іргесінің бүтін болып, елімізге береке-бірліктің нәсіп болуына тілектестік білдірді. Үлкен ас ішіліп болғаннан кейін қайталап Құран оқылып, асқа бата жасалды.
Айта кету керек, жақында Б.Момышұлы ауылының шығыс бөлігіндегі қабірстанның (зираттың) айналасын қоршау жұмыстары аяқталды. Бұл сауапты әрі игілікті іске ауыл тұрғындары мен «Жуалы» мешітінің жамағаты біркісідей жұмылып, қаражат жинау жұмыстарын атқарды. Бейітті қоршау жұмыстары ауыл тұрғындары мен жеке мердігерлердің күшімен атқарылды.
«Жаңа өмір»-ақпарат
