№1 Ш.Мұртаза атындағы мектеп-гимназияның бастауыш сынып мұғалімі Кәмшат Адиева бастауыш сынып бірлестігі айлығының өтуіне байланысты 2 «А» сыныбымен мектептің 100 жылдық мерейтойына арналған «Үлгілі гимназист» сайысын өткізді. Сайыстың мақсаты – жас ұрпақтың бойында сөзіне берік, ісіне адал, білімді көшбасшы қалыптастыру.
Кәмшат Қуанғанқызы «Үлгілі гимназист» сайысын жыл сайын өткізуді дәстүрге айналдырған. Әрбір ұйымдастырылып, өткізілген оқушылар арасындағы сайыс өзіндік ерекшеліктерімен қызықты.
Аталған байқау 5 кезеңнен тұрды, яғни, «Бәйге», «Дода», «Сандар сөйлейді», «Полиглот» және «Жекпе-жек».
Сайысқа мектеп директорының оқу ісі жөніндегі орынбасары Лейлә Бегайдарова және тәрбие ісі жөніндегі орынбасары Пакизат Тұрлыбекова қазылық етті.
Сайыстың бірінші «Бәйге» кезеңінде бүкіл сыныпқа іріктеу жүргізілді. Сұрақтарға дұрыс әрі шапшаң жауап берген оқушылар ғана екінші «Дода» кезеңіне өтуге мүмкіндік алды. Сұрақтардың мазмұнына аса мән берілген. Балаларға Мемлекеттік рәміздер және елімізде аталып өтілетін ұлттық мерекелер жайлы, Жуалының құрылу тарихы, Батыр Бауыржан Момышұлы мен жазушы Шерхан Мұртаза туралы мәліметтер және тағы басқа патриоттық тұрғыда сұрақтар қойылды. Осылайша, топ ішінен сегіз оқушы алға шықты.
Ал, «Дода» кезеңінде оқушылар интерактивті тақтада жасырылған тапсырмаларды орындады. Ұяшық таңдалып, оқушы ұпай санына байланысты жеңіл немесе қиын сұраққа жауап берді. Бұл кезеңде әдебиет, математика, жаратылыстану, дүниетану сынды пәндерге байланысты тапсырмалар қамтылды. Сайыс соңында аз ұпай жинаған екі оқушы ойыннан шықты.
Келесі «Сандар сөйлейді» кезеңіне алты оқушы қатысып, мектеп тарихына байланысты сандарды табу арқылы өз білімдерін көрсетсе, «Полиглот» кезеңінде жұмбақ жасырылды. Жұмбақтың жауабын оқушылар қазақ тілінде, сонан соң орыс және ағылшын тілдерінде тапты.
Бұл сайыста оқушылар орыс және ағылшын тілдерін меңгергенін көрсетті. Соңғы шешуші кезеңге сыныптың екі оқушысы Ертөре Аманғали және Алихан Ражаббой өтті.
«Жекпе-жек» кезеңінде оқушыларға қазылар алқасы өз тарапынан сұрақ қойып, жеңімпазды анықтады. Ұпай санына қарай «Үлгілі гимназист» атағын Ертөре Аманғали иеленді. Үздік оқушы Ертөреге медаль тағылып, Дипломмен марапатталды. Қалған қатысушыларға да ұпай санына байланысты І, ІІ және ІІІ дәрежелі дипломдар тапсырылды.
Клара Бабаханова,
№1 Ш.Мұртаза атындағы мектеп-гимназияның мұғалімі
