29-30 сәуір күндері Тараз қаласында Жамбыл облыстық білім басқармасының ұйымдастыруымен Ұлы Жеңістің 79 жылдығына және Қазақстан Республикасының Қарулы Күштерінің құрылғанына 32 жыл толуына арналған жалпы білім беретін мектеп оқушыларының арасында XXIV «Сапта жүріп ән айту» облыстық әскери байқауы өтті. Бірінші күні саптық дайындық, екінші күні әскери спорттық жарыс өтті.
Байқау алты кезеңнен тұрды. Яғни, автоматты толық емес бөлшектеу және жинақтау, кермеге тартылу, 100 метрге жүгіру, қыздар арасында пресс жасау, арқан тартыс, пневматикалық винтовкадан ату сынағы. Аталған кезеңдерден жуалылық команда еш мүдірместен өтті.
Облыстық байқауға әр ауданнан бір команда қатысты. Жуалы ауданынан «Бауыржан ұландары» командасы қатысып, жүлделі ІІ орынды иеленді.
Байқауға тыңғылықты дайындықпен барған 10-11 сынып оқушыларынан құрылған топта, яғни бір взводта 16 бала болды.
Команданың жеңіске жетуінде мектептегі алғашқы әскери және технологиялық дайындық пәні жетекшілерінің қосқан үлесі зор.
Лаура МҰСАБЕКОВА,
«Жаңа өмір»
