«Б.Момышұлы-Көлтоған-Қошқарата-Қызтоған» бағытындағы облыстық мәндегі жолдың қазіргі таңда Жұрымбай ауылы мен “Батыс Еуропа – Батыс Қытай” халықаралық дәлізіне дейінгі аралығын жөндеу жұмыстары жүріп жатыр. Жөндеу жұмыстарын күн суығанға дейін бітіріп алу жоспарлануда.
Жобаны іске асыруға 619 млн. теңге қаражат бөлінген. Мердігер тараздық «Corporation ABH» жауапкершілігі шектеулі серіктестігі болып табылады.
Бұл автожол бірқатар елдімекендердің арасын байланыстыратын маңызды көлік артериясы болып есептеледі. Сондықтан да бұл жолдың сапалы жөнделгені округ және аудан тұрғындары үшін де, шаруалар үшін де қолайлы болмақ.
Бригадир Нұргелді Қойлыбаевтың айтуынша, мердігер ұйым жобаны іске асыруға тамыз айының ортасында кіріскен. Қазір жұмыс қызу қарқынмен жүріп жатыр.
– Бізде жол жөндеу технологиясы қатаң сақталады. Жұмыстың сапасы көңілден шығуы үшін соңғы үлгідегі мамандандырылған заманауи жол машиналарын қолданудамыз. Анау жүрген машина риксейлер деп аталады, – дейді бригадир алыстан жолдың ортасында баяу жүріспен бері қарай қозғалып келе жатқан техниканы көрсетіп. – Машинаның қармау ені екі метр, орта тұсынан төмен түсетін ротор секілді үлкен жылдамдықпен айналып тұратын иір тістері бар.
Жұмыс барысын көру үшін учаске бригадиріне ілесіп, техниканың жанына жақындадық. Иір тістер төмендегі ескі асфальт жамылғысын қопсытып келе жатыр екен. Асфальттың қажетті қалыңдығы қапталдағы өлшеуішпен бақыланады.
Риксейлермен бірге шанағына цистерна артылған «КамАЗ» автокөлігі ілесіп келеді. Риксейлердің роторына су үздіксіз беріліп тұрады екен. Технология бойынша бұл қатып қалған асфальт жамылғысын жібіту үшін қажет, әрі қопсытуды жеңілдетеді.
– Риксейлерден соң грейдер жүріп өтіп, ұсатылған асфальтты жолдың табанынан қапталға алып тастайды. Жаңа асфальт салынар алдында ол жолдың табанына қайта төселіп, тегістеліп, таптағышпен тапталады. Одан кейін жаңа асфальт жамылғысымен тұтастыру үшін бетіне битум жағылады, – дейді бригадир Нұргелді Қойлыбаев.
Объекті басында мамандандырылған 12 техника мен түрлі мамандықтағы 12 жұмысшы жүр. Жол төсемі жаңа асфальт салуға дайын болғанда қосымша техникалар мен адам күші тартылмақ.
Учаске бригадирінің бұл салада еңбек еткеніне 16 жылдан астам уақыт болыпты. Ол негізгі жұмыстарды компания жұмысшылары істейтінін, ал қосалқы жұмыстарға жергілікті тұрғындар алынғанын айтты. Өндірісте жазатайым жағдайды болдырмау үшін күнделікті таңертең он минуттық техника қауіпсіздігі жөнінде нұсқамалық өткізіледі.
– Жоба бойынша жөндеу жұмыстары келесі жылға дейін өтпелі, бірақ біз күн суығанша жұмысты тоқтатпауды көздеп отырмыз. Бұл үшін компанияда барлық мүмкіндік бар. Материалдық-техникалық базамыз да, жұмыс персоналы да жеткілікті, – дейді бригадир.
Бір айта кетерлігі, өңірдің жол жөндеу қызметі нарығында өзіндік аты мен орны бар серіктестік басқа жол жөндеушілердей емес, төселетін асфальтты арнайы зертхана сараптамасынан өткізіп барып алады екен. Сонымен қатар, өнімнің сапасына, құрамына да қатты мән береді. Соның арқасында компанияның салған жолдары әркез сапалы шығып, ондаған жылдар бойына түрлі климаттық өзгерістерге төтеп беруде.
Лаура МұсабекоВА,
«Жаңа өмір»
