Мемлекет басшысы Қасым-Жомарт Тоқаев жаңа Конституция жобасына қатысты пікір білдіріп, бұл құжат Қазақстанның саяси және құқықтық дамуының мүлде жаңа кезеңін айқындайтынын атап өтті. Президенттің айтуынша, қазіргі уақытта жұртшылық назарына ұсынылған Конституция жобасы мазмұны мен мағынасы жағынан бұрынғыдан түбегейлі өзгеше.
«Қазірдің өзінде бір нәрсені күмәнсіз айтуға болады: жұртшылық назарына мүлде жаңа құжат ұсынылып отыр. Бұл құжат мемлекетіміз дамудың даңғыл жолына түскенін, яғни сапалық тұрғыдан жаңа деңгейге көтерілгенін көрсетеді», – деді Мемлекет басшысы.
Президент бұл реформаның басты ерекшелігі – оның халықтың тікелей қатысуымен әзірленуінде екенін атап өтті. Былтыр қазан айынан бастап азаматтарға өз пікірін еркін білдіруге мүмкіндік беріліп, eGov және eOtinish мемлекеттік цифрлық платформалары арқылы бірнеше мың ұсыныс келіп түскен. Барлық ұсыныстар арнайы құрылған Конституциялық комиссияның қарауына жолданды.
Азаматтардан түскен бастамаларды жүйелеу және жан-жақты саралау мақсатында 130 адамнан тұратын Конституциялық комиссия құрылды. Мемлекет басшысының айтуынша, бұл комиссия ауқымы мен кәсіби деңгейі тұрғысынан елімізде бұрын-соңды болмаған бірегей құрылым саналады. Айта кетерлігі, комиссия құрамына бұл жолы шетелдік мамандар енгізілген жоқ.
Комиссия жұмысы барынша ашық форматта өтті. Президенттің сөзінше, реформалар тарихында алғаш рет конституциялық өзгерістер кең көлемде талқыланып, комиссия отырыстары тікелей эфир арқылы көпшілік назарына ұсынылды. Бұл өз кезегінде қоғам тарапынан сенімнің артуына және саяси диалогтің нығаюына ықпал етті.
Осы уақытқа дейін Конституциялық комиссия он отырыс өткізген. Талқылау барысында енгізілуі тиіс өзгерістердің ауқымдылығы ескеріліп, комиссия мүшелері ортақ байламға келген. Атап айтқанда, «Ата Заңға жекелеген түзетулер енгізумен шектелу жеткіліксіз, қазіргі жағдайда жаңа Конституция қабылдау қажет» деген шешім қабылданды.
Соған сәйкес, қаңтар айында жаңа Конституцияның алғашқы нұсқасы жұртшылық назарына ұсынылды. Бұл бастама қоғамда кең резонанс тудырып, азаматтардың саяси белсенділігінің артқанын көрсетті. Президент бұл үрдісті оң құбылыс ретінде бағалап, халықтың ел тағдырына бейжай қарамайтынын айқын дәлелі деп атап өтті.
Мемлекет басшысы азаматтардың Конституция жобасының әрбір бабын қызу талқылап жатқанын, әртүрлі көзқарастар мен ұсыныстардың ашық айтылып жатқанын ерекше атап өтті. Оның айтуынша, бұл қоғамдағы саяси мәдениеттің жаңа деңгейге көтерілгенін білдіреді.
«Еліміз үшін “Әртүрлі көзқарас – біртұтас ұлт” және “плюрализмге – ашықпыз, экстремизмнен – қашықпыз” қағидаттары аса маңызды. Осындай ұстанымдар қоғамдық диалогтің дамуына және мемлекеттің тұрақты алға басуына жол ашады», – деді Президент.
Қасым-Жомарт Тоқаевтың пікірінше, жаңа Конституция «Халық үніне құлақ асатын мемлекет» тұжырымдамасының нақты көрінісі болып отыр. Цифрлық платформалардың кеңінен қолданылуы билік пен қоғам арасындағы байланысты нығайтып, азаматтардың ұсыныстарының ескерусіз қалмауына мүмкіндік берді.
Президент сөз соңында жаңа Конституцияның қабылдануы «Әділетті Қазақстан» құру жолындағы маңызды кезең екенін атап өтті. Оның айтуынша, бұл құжат ел дамуының стратегиялық бағытын айқындап қана қоймай, мемлекеттің сапалық тұрғыдан жаңа деңгейге көтерілгенін көрсететін басты негізге айналмақ.
