Қазақстанда жаңа Конституция жобасын талқылау барысында азаматтардың әлеуметтік және құқықтық қауіпсіздігіне қатысты маңызды нормалар ұсынылуда. Соның бірі – тұрғын үйге қол сұқпаушылықты күшейтуге бағытталған бастама. Адам құқықтары жөніндегі уәкіл Артур Ластаев Конституцияда сот шешімінсіз тұрғын үйден айыруға ғана емес, одан шығаруға да жол бермеу қажеттігін атап өтті.
Бұл ұсыныс азаматтардың баспанаға деген конституциялық құқығын нақты әрі кеңейтілген түрде қорғауды көздейді. Тұрғын үй – адамның жеке өмірі мен қауіпсіздігінің негізі. Сондықтан одан айыру немесе күштеп шығару тек соттың шешімімен жүзеге асуы тиіс. Мұндай норма әлеуметтік әділеттілікті қамтамасыз етіп қана қоймай, құқық қорғау және атқарушы органдардың жауапкершілігін арттырады.
Қазіргі таңда қоғамда тұрғын үйге қатысты даулы мәселелер аз емес. Әсіресе әлеуметтік осал топтар үшін баспанадан айырылу үлкен қауіп тудырады. Осы тұрғыдан алғанда, жаңа Конституция жобасында бұл мәселенің нақты бекітілуі мемлекет тарапынан азаматтардың құқығын қорғауға деген шынайы ниеттің көрінісі болып отыр.
Бұл бастама «Халық үніне құлақ асатын мемлекет» қағидатына толық сай келеді. Өйткені тұрғын үйге қатысты ұсыныстар қоғам тарапынан жиі көтеріліп келген еді. Конституцияда мұндай норманың бекітілуі құқықтық мемлекеттің басты белгісі – заң үстемдігін нығайта түседі.
Жалпы алғанда, тұрғын үйге қол сұқпаушылықты күшейтуге бағытталған бұл өзгеріс «Әділетті Қазақстан» құру жолындағы маңызды қадамдардың бірі ретінде бағаланады.
