Жамбыл облыстық ардагерлер кеңесі үстіміздегі жылдың 25 қаңтар күні кеңейтілген Төралқа отырысын өткізді.
Отырыста алдымен сөз алған облыстық ардагерлер кеңесінің төрағасы Еркінбек Солтыбаев жыл бойында атқарылған жұмыстарды баяндады.
Келесі кезекте аудандық ардагерлер кеңестерінің 2022 жылы атқарған жұмыстарының қорытындысын бес балдық бағалау критерийі бойынша облыстық ардагерлер кеңесінің ұйымдастыру бөлімінің меңгерушісі Қ.Ильясов баяндама жасады.
Жыл бойында атқарылған белсенді жұмыстардың нәтижесінде, 106 балл жинаған Жуалы аудандық ардагерлер кеңесі I орынды, 96 балл жинақтаған Жамбыл аудандық ардагерлер кеңесі II орынды, 91 балл жинаған Қордай және Т.Рысқұлов аудандық ардагерлер кеңестері III орынды иеленді. Сонымен қатар бағалы сыйлықтармен марапатталды.
Облыстық соттың судьясы Дәулет Тасыбаев «Дау-дамайды шешудегі билер мен соттың байланысы және міндеттері» туралы қарапайым тілмен түсініктеме берді. Кейбір аудандардағы шешімін таппай келе жатқан мәселелерге көңіл бөліп, бір арнаға тоғыстыратынына да тоқталып өтті.
Кеңейтілген отырысқа қатысқан ардагерлер өз ойларын ортаға салып, ұсыныс-пікірлерімен бөлісті.
Отырыс соңында «Жылдың үздік биі» анықталып, «Үздік би» аталымы Жуалы аудандық ардагерлер кеңесінің жанынан құрылған Б.Момышұлы ауылдық билер кеңесінің төрағасы Шора Исқақовқа берілді.
Мақпал САМАТҚЫЗЫ,
«Жаңа өмір»
