Мемлекеттік тіл – елдің тәуелсіздігі мен бірлігінің басты тіректерінің бірі. Ол – халықтың тарихын, мәдениетін, салт-дәстүрін және рухани құндылықтарын ұрпақтан ұрпаққа жеткізетін асыл мұра. Сондықтан мемлекеттік тілді дамыту мен қолдау – тек мемлекеттің ғана емес, әрбір азаматтың ортақ міндеті.
Қазақстан Республикасының Конституциясында қазақ тілі мемлекеттік тіл ретінде айқындалған. Бұл мәртебе қазақ тілінің қоғам өмірінің барлық саласында кеңінен қолданылуын көздейді. Мемлекеттік тілдің қолданылу аясын кеңейту арқылы елдің тұтастығы нығайып, азаматтардың өзара түсіністігі мен ынтымағы арта түседі.
Тілді қолдау үлкен іс-шаралардан ғана тұрмайды. Әрбір азамат күнделікті өмірде қазақ тілінде сөйлеп, ресми құжаттарды мемлекеттік тілде рәсімдеп, балаларын ана тіліне құрметпен қарауға тәрбиелеу арқылы өз үлесін қоса алады. Қызмет көрсету орындарында, білім беру ұйымдарында, мемлекеттік мекемелерде және бұқаралық ақпарат құралдарында мемлекеттік тілдің сапалы қолданылуы да ерекше маңызға ие.
Бүгінгі таңда мемлекеттік тілді меңгеруге барлық мүмкіндік жасалған. Түрлі оқу бағдарламалары, онлайн курстар, сөздіктер мен цифрлық платформалар әр азаматтың қазақ тілін үйренуіне жағдай жасап отыр. Ең бастысы – ниет пен жауапкершілік.
Мемлекеттік тілді құрметтеу – Отанды құрметтеудің көрінісі. Қазақ тілінің беделін көтеру арқылы біз ұлттық құндылықтарды сақтап, Тәуелсіз Қазақстанның болашағын нығайтамыз. Сондықтан мемлекеттік тілді қолдауға әрбір азамат өз үлесін қосуы – уақыт талабы әрі ел алдындағы азаматтық парыз.
Мемлекеттік тіл – ғасырлар бойы қалыптасқан бай мұраның, салт-дәстүрдің, ұлттық дүниетанымның айнасы. Қазақстан Республикасының Конституциясының 9- бабында қазақ тілі мемлекеттік тіл ретінде нақты айқындалған. Бұл – тілдің қоғам өмірінің барлық саласында қолданылуына құқықтық негіз береді.
Күнделікті қызмет барысында мемлекеттік тілдің маңызы ерекше сезіледі. Заң талаптарын жүзеге асыру, азаматтардың құқығын қорғау, әділ шешім қабылдау – барлығы да түсінікті әрі сауатты тілде жүргізілгенде ғана өз нәтижесін береді.
Азамат мемлекеттік органдарға жүгінгенде өзінің ойын еркін жеткізіп, қабылданған шешімді толық түсініп шығуы тиіс. Бұл – құқықтық мемлекеттің басты қағидаларының бірі.
Қорыта айтқанда, мемлекеттік тіл – тәуелсіз елдің негізгі қазығы. Ол – бірліктің, тұрақтылықтың, әділдіктің тірегі. Біз мемлекеттік тілді дамыту арқылы мемлекеттің іргесін нығайтып, келешек ұрпаққа берік ел қалдырамыз!
Дулат Досыбайлы,
аудандық сот әкімшісінің
бас маманы
