Жіті ішек инфекциялары – бактериялар, вирустар және басқа да ауру қоздырғыштарының ағзаға тағам, су немесе лас қол арқылы түсуінен пайда болатын жұқпалы аурулар тобы. Бұл аурулар жылдың кез келген мезгілінде кездескенімен, әсіресе жаз және күз айларында жиілейді. Себебі, осы кезеңде азық-түлік тез бұзылып, түрлі инфекциялардың таралу қаупі артады.
Жіті ішек инфекциясының негізгі белгілеріне іштің ауыруы, жүрек айну, құсу, жиі сұйық нәжіс, дене қызуының көтерілуі, әлсіздік және ағзаның сусыздануы жатады. Әсіресе, балалар, қарт адамдар және иммунитеті төмен азаматтар үшін бұл аурудың асқыну қаупі жоғары.
Аурудың алдын алу үшін қарапайым санитариялық-гигиеналық талаптарды сақтау жеткілікті:
• Тамақ ішер алдында және дәретханадан кейін қолды сабынмен мұқият жуу;
• Тек қауіпсіз, қайнатылған немесе сапасы тексерілген ауызсуды пайдалану;
• Жеміс-жидек пен көкөністерді ағын сумен жақсылап жуу;
• Ет, балық, жұмыртқа және сүт өнімдерін толық термиялық өңдеуден өткізу;
• Дайын және шикі тағамдарды бірге сақтамау;
• Тез бұзылатын тағамдарды тоңазытқышта сақтау және жарамдылық мерзіміне назар аудару;
• Көшеде немесе рұқсат етілмеген орындарда сатылатын тағам өнімдерін тұтынбау;
• Балаларға жеке бас гигиенасын сақтауды үйрету.
Егер ауру белгілері байқалса, өздігінен ем қабылдамай, дереу медициналық көмекке жүгіну қажет. Әсіресе құсу мен іш өтудің жиілеуі ағзаның қатты сусыздануына әкелуі мүмкін. Мұндай жағдайда уақытылы көрсетілген медициналық көмек ауыр асқынулардың алдын алады.
Тұрғындардың денсаулығын сақтау – әр азаматтың ортақ міндеті. Қарапайым тазалық ережелерін сақтау арқылы өзіңізді және жақындарыңызды жіті ішек инфекцияларынан қорғай аласыз. Денсаулық – баға жетпес байлық. Сондықтан аурудың алдын алу емдеуден әлдеқайда тиімді екенін әрдайым есте сақтайық.
Байділда Шиналиев,
Жамбыл облыстық санитариялық-эпидемиологиялық бақылау департаментінің басшысы
